Kakuyaw mag-kandidato

Kay napatay man ang mihimo og pagsuway pagpatay kang kanhi United States President Donald Trump, mora’g lisud na mahibaw-an kon kinsa ang nagsugo aron siya patyon.

Magpapili pagbalik si Trump sa pagka presidente sa United States ug mihimo siya’g diskurso didto sa Pennsylvania dihang dunay misuway pagpatay kaniya pinaagi sa pagpusil.

Dili pa ta makaingon nga duna bay kalabotan sa politika ang maong assassination attempt, kay si US President Joe Biden abtik man kaayong nakasaway sa maong pagpatay unta ni Trump.

Maayo gani kay dili gyud hingigo ang tawo nga mitiro kang Trump kay sa dunggan ra man naigo. Hinuon, layo ra kuno ang nahimutangan sa gunman nga didto sa atop nagtungtong.

Mas kuyaw diay didto sa Amerika kay sa Pilipinas kay base sa history, duna nay mga president sa United States nga gipatay ug may lain sab nga gisuwayan pagpatay.

Nahinumdom mo nga si President John F. Kennedy gi-assassinate man kaniadtong 1963 samtang naghimo og motorcade, unya ang iyang igsuon nga si Bobby Kennedy gipatay sab 1968.

Si President Ronald Reagan naka-survived sa assassination attempt niadtong 1981. Kuyawa bitaw didto sa United States uy. Lahi man gud didto kay two-party system man sila.

Dinhi sa Pilipinas, ang kuyaw mao ang mga kandidato nga kusog sa survey, apan unya pa man sa 2028 ang eleksyon sa presidente.

Lahi sab dinhi sa ato kay kon nahimo ka na nga presidente sa nasud, dili ka na mahimong makadagan pagbalik kay gilatid kana sa atong Konstitusyon.

Pagka karon, ang gihugon-hugonan nga modagan sa pagka presidente sa nasud unya sa 2028 posible si Vice President Sara Duterte ug si House Speaker Martin Romualdez.

Pero sigurado ko nga duna pay laing mga politiko nga magpapili sa labing taas nga katungdanan bisan og sila way kahigayonan nga modaog.

Aw, kini sila si Sara ug Martin, mag-fight gyud ning duha kay pulos man usab sila mga abogado. Makabentaha lang si Martin kay maisip man siya nga administration candidate sanglit ig-agaw man niya si Presidente Bongbong Marcos.

Pero ang ganahan gyud unta nako nga mahimong presidente mao si kanhi Senador Panfilo Lacson kay dili kurakot, ug wa gani modawat og pork barrel nga tag P70 Milyones ang tuig.

Tan-aw nako, dili sikat si Lacson sa mga botante kay dili man gud siya tigpakaaron-ingnon nga ngisihan ang mga botante atol sa kampanya, ug sa mga interview.

Apan ako nga nakaila gyud ni Lacson makaingon ko nga pagka-anugon nga dili siya mahimong presidente sa nasud nga suhito na kaayo sa pagdumala sa Pilipinas.