Tanan mopatalinghug sa kwarta

Giingon nga nagkagamay na ang kalibotan ni Pastor Apollo Quiboloy human mosaad si DILG Secretary Benhur Abalos nga gamiton niini ang tanan nila’ng resources aron madakpan na gyud siya.   Maisog kining maong saad ni Abalos.  Apan dili nato hikalimtan nga, gawas nga nangangkon si Quiboloy nga siya “Anak sa Diyos,” daghan usab kini siya og bahandi nga magamit niya “pagpadako” sa iyang kalibotan.  Kay ginaingon bitaw nga, “Kon ang kwarta na gani ang mamulong, ang tanan mopatalinghug gayod.”  Muleeng!

WALA PA MATUMAN ANG SAAD

Gisaway sa pipila ka mga kongresista ang pamahayag ni Bise Presidente Sara Duterte nga dili siya motambong sa SONA sa Presidente tungod kay gitudlo man niya ang iyang kaugalingon isip “designated survivor.”  Tataw nga dili lang ganahan motambong ang Bise Presidente sa SONA ug nag-komedya lang kini sa iyang pagtudlo sa kaugalingon isip “designated survivor.”  Hinuon, nahasubay man sa Konstitusyon ang maong pamahayag.  Matud pa sa akong amigo, “Dili angay kabalak-an ug walay dautang mahitabo sa Presidente kay wala pa niya matuman ang saad nga tag-P 20 na lang ang kilo sa bugas”.  Fezteleern!

MODAGHAN ANG ASIN-DERO

Miumol ang Department of Agriculture og usa ka Technical Working Group (TWG) nga maoy modumala sa research development ug pagpalambo sa industriya sa asin sa nasud pinaagi sa mga moderno ug mechanized nga pamaagi.  Tuyo sa DA nga maseguro ang suplay sa asin bisan pa man sa nag-usab-usab nga panahon.  Ginaingon nga ang asin gihimugso sa labing dalisay ug puro nga mga ginikanan: ang adlaw ug ang dagat.  Kon makina na ang gamiton sa pagbuhat og asin, modaghan na kuno ang atong suplay.  Nagpasabot usab kini nga modaghan na ang mga “ASIN-DERO” kon tindero sa asin.  Atala lagee!

BUGSAY NA LANG

Alang kang Cebu City Acting Mayor Raymond Alvin Garcia, ahat kon “premature” pa ang deklarasyon nga sub-standard ang Cebu City Sports Center (CCSC) track oval tungod kay kulang ang sukod niini og bale 20 metros.  Gigamit na sa Palarong Pambansa niadtong 1994 apan walay susamang isyu nga gikataho kabahin niini. Makapahinumdum kini sa panday nga magbuhat unta’g kasko sa sakayan ginamit ang dakong punoan sa tipolo.  Tungod kay hiwi pa man, gipuli-puli niya’g sapsap ang kilid hangtud nga gamay na lang kaayo ang nahibilin nga kahoy.  Busa, inay kasko sa sakayan ang buhaton, nakahukom na lang ang panday nga bugsay na lang ang iyang himoon.  Pagkatoytoy!   

WALA’Y MADISIPLINA

Gikataho nga adunay mga taxi driver nga mipahimulos sa mga delegado sa Palarong Pambansa pinaagi sa pagpangayo og subra nga plitehan kon “overcharging.”  Giawhag sa LTFRB ug sa LTO ang mga nabiktima nga mopasaka og kaso sa mga pasaway nga driver. Mas maayo tingale nga ang LTO ug LTFRB na ang mangunay pagdakop niining mga mapahimuslanon nga taxi driver.  Kon maghulat ang LTO ug LTFRB nga adunay mopasaka’g kaso, walay driver nga madisiplina.  Basin mahubagan na hinuon ang ilang mga lubot sa pagsige na lang og nilingkod.  Madahaan!