"Till death do us part" gituman sa asawa

Ingon niini ka dako ang gugma sa usa ka asawa kansang bana ang unang naanod sa baha didto sa lungsod sa Carmen niadtong Lunes sa Hapon diin pito ka kinabuhi gyud ang nakalas human gilamoy sa baha ang pickup nga gisakyan sa 17 ka mga tawo apil na ang magtiayon nga duha pa lang ka duha human sa ilang kasal.

Matud sa mga suod nga higala sa magtiayon nga diha sa sulod sa pickup ang asawa kinsa pito ka buwan nga mabdos, maluwas ra gyud unta siya kay mahimo mang makapatong sa dakong bato nga maoy gihimo sa iyang mga kauban nga naa sa sulod sa sakyanan.

Apan dihang nakita niya ang iyang bana nga naanod na kinsa misuway usab og luwas sa laing sakay sa pickup. Misuway usab og apas ang asawa sa bana sa pamasin nga iya kining maluwas apan silang tanan nga naanod sa baha ang nakalas sa trahedya.

Nabangalan ang ilang mga lawas sa kadagatan nga niabot na gani sa Camotes ug didto sa Borbon, unang nabangalan ang lawas sa babaye dayon sunod ang babaye.

Alang sa mga higala sa babaye nga maisip gani siya nga bayani sa napulo ka mga kauban nila nga naluwas kay kong wala pa naablihan sa babaye ang pultahan sa sakyanan nga nasangit sa bato, silang tanan nalumos. Maayo nalang kay naablihan ang pultahan ug nakatkat sa dakong bato ang napulo ka mga kauban nila ug naluwas.

Dili matukib ang kasakit nga gabati sanglit kalit kaayo kay adlaw'ng Sabado pa sila naglipay-lipay sa ilang kasal apan gibawsan dayon og kasakit tungod sa ilang kamatayon.

Nasayran usab nga moadto unta diay ang magtiayon sa Camotes kay taga didto man ang bana. Lunes gyud unta ang ilang schedule sa paglarga apan naay spotting ang asawa maong giangan-angan nila ang paglarga ug mao na hinuon kini ang nahimong signos sa ilang kinabuhi.

Atol sa paglubong sa mga biktima sa trahedya natumog sa luha ang simbahan ug ang sementeryo sa mga nagbangotan nilang pamilya ug mga higala, sakit man apan gidawat nila ang tanan ug dili na sila gustong mobasol pa sa driver sa nahitabo kay biktima usab kini sa trahedya kinsa namatyan usab og anak.

Ang nahitabo sa Carmen dili layo nga mahitabo usab sa ubang dapit ilabi na karon nga ting-uwan na ug lahi na kaayo ang panahon nga mura'g mabatyagan nato ang kabangis niini busa magmatngon gyud kanunay.

Sa mga hingtungdan nga ahensiya sa gobiyerno, ma LGU man o national angayan nga mas pahugtan pa nila ang ilang pagpalig-on sa mga lakang pinaagi sa pagbutang og mga pahibawo sa mga dapit nga delikado kaayo ug ang mga tawo gikinahanglan nga maantigo nga mohukom kon unsa ang makaayo ug unsa ang dili kay gamay’ng sipyat lang kinabuhi ang mawagtang.