EDITORYAL - Latang puno sa ulod

Sa nagpadayong Senate hearing mahitungod sa Philippine Overseas Gaming Operations, daghan pa unyang lata nga puno sa ulod nga mautingkay.

Sa nakalabay nga administrasyong Duterte daghang POGO hubs nga nibutho nga daw mga uhong sa nagkalain-laing suok sa nasud ug hangtud karon padayon pa gihapon sa ilang operasyon.

Ang uban niini, legal nga nag-operate samtang ang uban dili ug kwestyonable kun giunsa pagkahitabo nga naka-operate sila dinhi ug kun kinsa ang mga dagkong opisyales kaniadto nga nagpaluyo kanila.

Ning bag-o, gihinganlan na gyud kun kinsa ang kanhi miyembro sa gabinete sa administrasyong Duterte nga matud pa nangabugar sa operasyon sa POGO hub sa Porac, Pampanga nga Lucky 99 aron sila makakuha og lisensiya ug permit.

Ang pangulo sa PAGCOR nga si Alejandro Tengco mibutyag atubangan sa Senate hearing nga ang kanhi tigpamaba ni kanhi president Rodrigo Duterte nga si Harry Roque maoy matud pa nangabugar para sa POGO sa Bamban.

Ang rebelasyon ni Tengco sukwahi sa gipaabot sa kadaghanan nga posibleng may koneksiyon sa POGO complex sa Bamban, Pampanga ang kanhi gabinete, kondili sa laing lungsod sab diay sa mao gihapong probinsya.

Ang suspendedong mayor sa Bamban nga si Alice Guo kinsa nahibaw-an nga siya si Guo Hua Ping ug dili tinuod nga Pilipino maoy gidudahang nagpaluyo sa operasyon sa POGO sa iyang lungsod nga bag-ohay lang gironda sa kapolisan tungod sa human trafficking, torture ug online scamming operations.

Si Guo kinsa gidudahan sab nga espiya sa China ug laing pito ka tawo ang gi-contempt sa Senado tungod sa padayung wala pagtambong og balik sa hearing, ug posibleng malutsan sab og warrant of arrest.

Ang pangutana, kinsa usab kaha ang nangabugar gawas lang Guo, aron maka-operate ang POGO sa iyang lungsod? Lain pud kaha nga taas nga opisyal sa nasudnong gobiyerno kaniadtong nakalabay nga administrasyon?

Ang uban pang mga POGO hubs nga ilegal nga nag-operate karon kinsa kaha pa nga mga kanhi opisyales ang nangabugar kanila. Mas maayong sayo palang mahibaw-an na kun si kinsa kini sila ug masayud ang katawhang Pilipino sa ilang gipangbuhat sa dihang sila naa sa gahum ug ang katawhan na maoy modesisyon kun unsay ilang ikasulti.