Di gyud mokumpiyansa

Pag-adto nako sa Barili, sa dapit nga pinuy-anan sa akong inahan, gipalabang sab nako ang akong sakyanan sa dakong sapa nga mabaw ra og tubig, kay wa may taytayan.

Apan paghimo nako niini, gisiguro ko nga way dag-om didto sa bukid kay peligro kon nag-uwan sa bukid ug mokalit lang pag-abot ang dakong baha nga maatol sa akong paglabang sa sapa.

Kadtong gihimo sa grupo sa bag-ong minyo nga nag-party didto sa bukid sa Carmen niadtong Martes, ug sa ilang pagpauli nagsakay sila og pickup nga sakyanan, dayon milabang sa sapa nga kusog na ang baha, dili kadto maayo.

Resulta, gianod sa baha ang Isuzu D-Max nga gisakyan og 17 ka tawo. Naanod ang mga nagsakay sa sakyanan, ug ang babaye nga bag-ong gikasal, namatay uban sa laing kauban.

Duna pay lima nga gipangita pa, ug ambot nakit-an na ba. Kadaghan na ko makakita nga duna gyuy mga driver nga mosungasong pagpadagan agi sa spillway bisan og baha na.

Ang uban gidemalas ug naanod, duna say milampos sa pagtabok kay ang sakyanan nakasungasong man sa bul-og sa tubig. Pero ang akong tambag, likayi gyud nga inyo kining buhaton. Bisan ang paglabang sa baha nga maglakaw, peligro kaayo kon dili ka makamao sa pamaagi, ilabi na kon dili ka makamao molangoy.

Himoa ang hitabo didto sa Carmen nga usa ka leksiyon, ug ayaw gyud pagsunod sa ilang gihimo aron malikayan ang disgrasya, total may kinutoban ang pagbaha.

* * *

Gidayeg nako si Vice President Sara Duterte kay pag-anhi niya sa Cebu City kaniadtong Martes, wa gyud siya malimot pagbisita sa Basilica Minore del Santo Niño.

Dinhi usab sa Cebu City kaniadtong Martes si Presidente Bongbong Marcos, pero ambot og nakabisita ba siya sa Basilica. Wa man gyud hinoo’y lagda nga kon moanhi sa Cebu ang mga opisyal kinahanglang mobisita sa Basilica.

Pero para nako, nindot ang gihimo ni Inday Sara ug nga unta kaluy-an siya ni Santo Niño nga panalipdan siya kanunay, ilabi na karon nga dunay gustong dili siya ang mahimong sunod nga presidente sa nasud.

Dia sila si Bongbong ug Sara sa Sugbo kay pareho sila nga mitambong sa pagbukas sa Palarong Pambansa.

Lain pa’y ato, mora’g wa man diay makatambong si Mayor Michael Rama sa pagbukas sa Palaro. Para nako, nindot unta nga nakatambong siya kay iya ra ba gyud ang paninguha nga anhi sa Sugbo himoa ang nasudnong sports event. Aw hinuon, maayo man sab ang pagkadala ni Cebu City Acting Mayor Raymond Alvin Garcia sa Palarong Pambansa.