Dili lang pugson

Wala mopatim-aw si kanhi DepEd Secretary nga si Bise Presidente Sara Duterte sa seremonyas pagbukas sa Palarong Pambansa 2024 bisan pa man kon ang DepEd maoy ahensiya sa gobiyerno nga gitahasan sa pagpahigayon sa mga kalihokan.  Mao unta kadto ang una’ng higayon nga magkauban ang presidente ug ang bise presidente sa usa publikong kalihokan sukad nga mi-demiter sa pagka-kalihim ang naulahi.    Adunay mga butang nga dili gayod mahimong magkuyog, sama sa tubig ug lana, orange juice ug toothpaste, o ba kaha, kalayo ug gasolina.  Matud pa sa mga batan-on, “Dili na lang pugson kay basin modugo.”  Mao maan!

Hulga sa kompetisyon

Gisaway sa usa ka beterano’ng kapitan sa barko ang sugyot ni Congressman Kristine Alexie Tutor nga kinahanglan mangita ang Department of Migrant Workers (DMW) og bag-ong mga market alang sa atong mga seafarers taliwala sa hulga sa mga pagpangatake sa mga pirata.   Bisan sa dakong risgo sa mga pirata, pilit ang atong mga marinero sa pagdawat sa trabaho tungod sa kadaghan sa kompetisyon sa mga marinero sa ubang nasud.  Makapahinumdum sa lecture sa mga mananagat diin gikumbinsir sila nga dili kuhaon ang mga lambay nga “bidhan” iyawat na lang nga kini mosanay pa.  Apan tubag sa usa ka mananagat, “Kon dili nako kuhaon Sir, lain man sad ang mokuha. May’pa ako na lang.”  Fezteleern!

Gikasilagan sa bag-ong pariseo

Gikwestiyon sa kampo ni KOJC leader Apollo Quiboloy ang motibo sa mga pribadong indibiduwal sa ilang pagtanyag og P10 milyones nga ganti niadtong makahatag impormasyon aron madakpan si Quiboloy.  Dili na angay ikahibulong ni Quiboloy ug sa iyang kampo kining pagtanyag sa maong ganti.  Tungod sa iyang pagpangangkon nga siya “Tinudlo nga Anak sa Diyos,” ila na lang usab hunahunaon nga, sama sa nahitabo ni Hesukristo, adunay mga bag-ong Pariseo ug Saduceo nga nasilag ug buot molutos kaniya.  Muleeng!

Dili tanan makabayad

Supak si Konsehal Nerissa Soon-Ruiz nga mangutang ang kagamhanan sa dakbayan sa Mandaue alang sa pagtukod sa bag-ong Mandaue government center.  Alang sa konsehal, mas maayo nga nga ipatuman na lang ang proyekto pinaagi sa Public-Private Partnership (PPP) labi pa nga adunay daghang tanyag nga nadawat ang kagamhanan kabahin niini.  Dugang pa niya, ang pagpangutang maghatag og dugang palas-onon sa bulohisan sa mga Mandauehanon aron ibayad niini.  Apan matud pa sa akong amigo, “Dili tingale tanan makabayad sa maong utang, kay ang uban kanato patay na man sa panahon unya sa tingbayad.”  Madahaan!

Kultura sa kurapsyon

Namahayag si House Secretary General Reginald Velasco nga dili tugotan nga motambong sa SONA ni Presidente Marcos kadtong mga bisita nga magsul-ob ug sinina nga adunay pamahayag o mga hulagway sa pagprotesta ug pagbugal-bugal.  Alang kang Velasco, ang SONA dili adlaw sa pagprotesta kon dili usa ka pormal nga okasyon busa ang tugtan nga biste mao lamang ang barong o Filipiniana ug kadtong magtamod sa atong kultura.  Daw kultura na man sa atong gobyerno ang kurapsyon, busa mahimo tingale nga magsul-ob ang bisita og sinina nga adunay pamahayag nga nag-ingon, “Ipadayon ang kurapsyon sa kagamhanan.”  Pagkatoytoy!