Dapig sa mga kaaway
Kon ang kampo nilang Apollo Quiboloy ug kanhi Presidente Rodrigo Duterte ang pa-undayonan, di angay nga dakpon si Quiboloy bisan pa kon naluwatan na og arrest warrant sa mga korte sa Pilipinas ug Estados Unidos. Para nila sayop ang tanang paningkamot sa gobiyerno pagpatubag ni Quiboloy sa bangis nga mga krimen nga gipasangil batok niya.
Sa pikas nga bahin, wa silay nakita nga bisan gamay nga problema sa ilang pagdupa niya. Wa gani silay pupanagana, ni kaikog sa balaod, nga nipakita sa tanang hingtungdan sa ilang pagtabang og tago niya.
* * *
Labing uwahi nilang gikuwestiyon mao ang pahibawo ni Kalihim Benhur Abalos sa Department of Interior and Local Government (DILG) sa P15 milyones nga ganti ni bisan kinsa nga makahatag og kasayuran nga moresulta sa pagkasikop nilang Quiboloy ug kaubang mga sinumbong.
Para nila di angay nga magpalabi ang gobiyerno sa pagpangita og mga paagi sa pagdakop ni Quiboloy bisan tulo ka buwan nang nag-ung-ong ang lima ka warrants of arrest batok niya. Mas ganahan sila nga manlipaghong sa kauwaw ang gobyerno sa kakublan sa balaod sa ilang mga alyado.
* * *
Gikuwestiyon sab nila ang dinungan nga ronda sa kapolisan sa tanang gidudahan nga mga tagoanan ni Quiboloy sa niaging buwan. Para nila dakong krimen ang pagpalihok sa gatos ka polis ug pagtugot nila pagbitbit og mga armas pagpanalipod sa ilang kaugalingon gikan sa lunod patay nga mga dumadapig sa sinumbong.
Wa gani sila magpaka aron ingnon nga nibadlong ug nisaway sa pagbombardiyo sa mga loyalista ni Quiboloy og water cannons ug pagdala nila og mga sundang batok sa unipormadong mga polis.
* * *
Nga posibleng ilang nasunod sa labaw nga idolo nilang Duterte ug Quiboloy–ang China nga nidangop na sa labing bangis ug bastos nga mga paagi sa pagpanghasi sa atong kasundalohan ug mga mangingisda sa West Philippine Sea.
Hinaut nga di mahudlat ug labaw na nga di paundayonan sa administrasyon ni Presidente Ferdinand Marcos Jr. ang kahawod nilang Duterte ug Quiboloy ug ilang mga propagandista ug mga dumadapig nga wa nay lipud-lipod nga nipakita sa tinuod nilang bulok–ang pagdapig sa mga malapason sa balaod ug mga kaaway sa republika.
* * *
- Latest
