Ang bato nga nakaluwas sa mga tawong naanod sa sapa

Wala magdahum ang usa ka pamilyahan sa lungsod sa Carmen nga human sa ilang bonding sa usa ka mountain resort sa ilang dapit, pulihan ba diay kini sa kasakit tungod sa nahitabong trahedya niadtong nakalabay’ng adlaw atol sa pagbundak sa kusog nga uwan.

Gianod sa kusog nga bul-og sa baha ang ilang gisakyan nga pickup human mipugos pag-agi ang driver sa karsada nga giagian sa baha gikan sa usa ka creek ug gibanlas sila sa mas dakong sapa nga anaa sa pikas tampi sa karsada.

Napatung-an ang portion sa karsada sa usa ka creek ug sa dakong sapa busa dihang miagi ang sakyanan gilamoy sila sa hilabihan ka kusog nga baha.

Nakapagrabe pa ang nanghinubrang sakay niini nga niabot a 17 ka mga tawo maong dali ra kaayo silang gianod.

Matud sa mga nakasaksi nga unang nangaanod ang pito ka mga sakay nga hangtud karon na missing pa, samtang kadtong ang napulo ang nakalingkawas sa peligro human sila masangit ang sakyanan sa dakong bato sa tunga sa sapa ug didto sila namatong kinsa naghuwat sa mga rescuers.

Kong wala pa ang naasoy’ng bato, segurado gyud kuno silang tanan ang mabutang sa peligro ang kinabuhi. Gani usa ka batang 11-anyos ang nabangalan nga wala nay kinabuhi kagahapon sa buntag.

Matud sa mga tawo didtong dapita nga kapila na ka higayon nga gipakuha ang bato sa dapit aron dili makaali sa agianan sa tubig apan misiga ra kuno ang mga heavy equipment kon ila na kining tangtangon, busa nagtuo ang mga tawo nga adunay kahibulongang panghitabo nga dili mapasabot sa mga experto ug ang pagkaluwas sa mga tawo nga nipatong sa bato ang ilang gipasalamat.

Bitaw balikan nato ang panghitabo, dili naman unta angayan nga basolon ang driver sa pickup truck kay apil man ang iyang pamilya sa trahedya apan angayan kining himoon nga leksyon nga dili gyud kapangandakan ang kinaiyahan kay basin magtoo nga kaya apan dili diay nga mosangpot na sa walay kataposan nga pagmahay.

Sa habig sa lokal nga kagamhanan, angayan nga butangan og mga pahimangno ang ingon niini nga dapit aron malikay ang mga tawo sa peligro sa ilang kinabuhi.

Labaw sa tanan ang mga tawo nasayod na kon unsay makaayo ug makadaut, busa dili nalang gyud ipanimpalad ang kinabuhi.

Mamahimo ra man nga mangita og dapit nga mas luwas ug ayha na mobiyahe kong segurado nga dili na delikado.

Manghinaut lang kita nga unta makit-an na ang mga tawo nga gianod sa baha ug luwas ra unta sila. Pag-ampo gyud ang bugtong kadangpan sa ingon niini nga pagsuway nga nahiaguman.