Ultimong pagduaw gipabaraw

Pagbisita nila ni kanhi Presidente Rodrigo Roa Duterte (PRRD), Davao City Mayor Sebastian ‘Baste’ Z. Duterte ug kaubanan atol sa usa ka kapiyestahan sa Tacloban City sa miaging Hunyo, 30, 2024, diha pa lang sila sa simbahan, adunay nay mipahibalo ni Atty. Levito Baligod, kinsa maoy host ug miabiabi nila ni PRRD, nga aduna kunoy kapolisang miadto sa inandam nga venue ug mimandong pahawanan ang stage, ipatangtang ang sound system ug gipang-abog ang nagkapundok nang katawhan.

Atubangan sa midugok nga media, ang abogado mipadayon sa pagsaysay: “Kaya nag-divert kami, pumunta kami kaagad sa GMA 7, at may nagpanggap ng isang tao na galling daw siya ng City Hall ng Tacloban, na hinahanapan kami ng permit.”

Klarong pangpiit. Pero wala magpapiit ang attorney. Miilabok, mi-counter, namahayag: “Sabi ko, sa mga ganitong gatherings sa mga miyembro ng Guardians, ay hindi kailangan ang permit. At ang sabi niya sa akin, ay poposasan kita mamaya. So, sabi ko, sige, baka gusto mong magsubukan tayo.

Unya, gipangutana ang polis, kinsa bag-o lang diay'ng na-promote pagka-Lieutenant Colonel sa PNP, ni Atty. Baligod kon may ‘legal order’ ba ang maong kasugoan ug kinsa ba gyong amoha ang nagsugo? Diin, dali ra kining nakatubag: “Sir, hindi sa aking superior nanggaling! Pero alam nyo na kung sino?”

Pastilan, hasta pagtug-an kinsay nagsugo, dili otomatik makatumbok-tudlo ang ang maong polis? Hinuon, niining administrasiyong Marcos, namatikdan. Nga kon kinsa kadtong motug-an sa tinuod ug dili kaantigo motago'g bakak, sibakon gayod. Bawal ang mopalanog sa ilang tiunayng sentimento nga makadaot sa imahe sa mga Romualdez-Araneta-Marcos governance.

Rason, nga ilang gyod kining babagan-gukdon-patak-umon, bahalag ang pagbuhat sa ingon nakalapas na sa tawhanong katungod.

Busa, dili ikahibulong. Nga bisag giklaro na nila ni Tatay Digong ug Mayor Baste nga ang ilang pag-adto sa Tacloban City atol sa usa ka piyesta, aron lamang pagduaw sa dapit ug pagpangumusta sa katawhan, kinsa kinasingkasing nilang gitabangan panahon sa mapintas bagyong Yolanda, may kapolisan gihapong misulay sa pagbaraw niini gamit ilang posas. Pero wala makadulot ang ilang pagpanghadlok batok sa kaisog ug kahait ni Atty. Baligod.

Nadayon gayod ang maong simpleng programa sa paghimamatay. Ug ang police officer pa hinuon maoy nahingawa.