Pagbansay sa mga batan-on

Andam na ang tanan alang sa dakbayan sa Sugbo nga maoy mo-host sa Palarong Pambansa 2024, ang labing dakong kompetisyon sa paugnat sa kusog nga gipasiugdahan sa nasyonal nga kagamhanan alang sa mga batan-on atleta matag tuig.

Gikan sa Hulyo 9 hangtod 16, liboan ka mga atleta, coaches ug uban pa gikan sa nagkalainlaing rehiyon sa nasud ang mag-abot sa dakbayan sa Sugbo alang niining dakong kalihokan sa Departamento sa Edukasyon karong tuiga.

Usa ang Palarong Pambansa sa mga nag-unang benyo diin mabansay ang atong mga batan-ong atleta. Mao nga importante kaayo ang papel nga gihuptan niini alang sa kampanya sa kagamhanan pag-develop sa sektor sa paugnat sa kusog sa nasud.

Ang mga atleta nga mosalmot sa Palarong Pambansa gikan sa matag rehiyon pulos mga gihashasan usab sa ilang mga eskuwelahan. Busa makapaabot kita og mga de kalidad nga mga dula sulod sa pipila ka adlaw nga kompetisyon.

Apan, hinaut nga dili lamang kutob sa Palarong Pambansa ang pag-aruga sa atong mga batan-ong atleta, ilabina niadtong mga mananaug. Hinuat nga padayon ang suporta sa kagamhanan kanila alang sa tinud-anay nga paglambo sa ilang mga talento.

Adunay daghang mga kaso diin adunay mga batan-on kinsa adunay talento sa paugnat sa kusog apan minus ang paglambo sa ilang mga skills gumikan sa ka kulang sa training. Ug kini mao unta ang hatagan og unang pagtagad sa kagamhanan.

Anaa sa pag-umol sa kabataan sa paugnat sa kusog ang de kalidad nga mga atleta nga ipasundayag unya sa nasud sa mga international competitions. Ug kinahanglan gayud ang todo nga suporta gikan sa kahamhanan alang sa kalamboan sa ilang mga talento.

Hinuon, ang pagpahigayon sa Palarong Pambansa dili lamang kabahin sa medalya o sa mga mananaug. Kini mahitungod usab sa pag-umol sa kaugmaon sa mga atleta nga Pilipino, pagpalambo sa panaghigalaay, ug pagtanom sa usa ka kabilin sa maayo nga pasundayag sa paugnant sa kusog.