EDITORYAL - ‘Imported’ maoy nipatay sa lokal nga industriya

Sa pagsugod sa globalisasyon, mura og naglumba ang nagkadaiyang mga nasud pagpaila ug pagbaligya sa ilang mga produkto ngadto sa ubang nasud.

Apan kani sab maoy hinungdan nganong daghang mga lokal nga kompanya dinhi sa Pilipinas ang napugos sa pagpanirado kay wala na silay halin tungod gipabahaan man ang merkado og daghang mga mas barato nga mga “Made in China.”

Gikan sa simpleng thumbtacks ngadto sa mga heavy equipment naa ang China. Wa na tingali tindahan, malls ug groceries nga way baligyang “Made in China” sa ilang mga estante. Kinaiya sab sa mga Pilipino ang pagkamahiligon sa “imported” o ba kaha “murag original” o “class A” basta lang naa, gawas makadaginot sa kwarta dali ra sab ilisan.

Tinuod nga ‘substandard’ ug dili sama kalig-on ang kalidad sa mga produkto sa China, apan barato kini kun itandi sa Western products o bisan Philippine Made.

Kay kun daling maguba, duna nay giandam nga daghang ‘spare parts’ ang China para niini, ilaha na kining gipangandaman daan.  Sa sige og kaguba, ug sige og palit og replacement parts matag karon ug unya, tabla ra gihapon og nipalit og brand news nga branded nga produkto, ang kalainan lang way labad sa ulo ug walay aberya.

Kining mga imported nga mga ginagmay nga produktong gikan sa China sama sa school supplies, mga lansang, tornilyo, goma, gamit sa panday, hairclips, ribbons,  sapatos, panapton, mga fashion accessories, mga gamit sa kusina nga dili di kuryente, ug uban pa, kaya ra man unta kining buhaton sa mga Pilipino dinhi.

Apan wa sila makasugakod sa kompetisyon batok sa China, didto sa ilang nasud barato ra kaayo ilang sweldo sa trabahante, barato sab ila materyales maong makahimo sila og dinaghan ug barato ra nilang ibaligya.

Sukwahi dinhi sa Pilipinas, nihit ang raw materials maong i-import pa, mahal sab ang sweldo sa mga trabahante mao nga di sab nila pwedeng ibaligya og barato sama sa Made in China. Aron molahutay ang mga lokal nga pabrika dinhi, kinahanglang pahamtangan sa gobiyerno sa Pilipinas og taas nga tariff taxes ang mga produktong mabuhat ra dinhi. Aning paagiha, mokusog ang lokal nga mga producers/manufacturers ug maka-kompetinsiya sa uban.