Tulis sa PhilHealth
Dugay rang nagpanilap ang Malakanyang sa dakong kuwarta sa Philippine Health Insurance Corporation (PhilHealth). Sa Mayo sa niaging tuig, gisugo sa opisina ni Presidente Ferdinand Marcos Jr. si Dr. Maria Rosario Vergeire, officer in charge sa Department of Health (DOH), sa pagtukod og technical working group (TWG) nga motuon sa pagbalhin sa PhilHealth gikan sa DOH ngadto sa Office of the President (OP).
Pero gibaraw dayon ni Senador Risa Hontiveros. Hilom nga gihunong sa Malakanyang ang maniobra. May sukaranan ang pagduda nga ang puntil sa PhilHealth ang tuyo sa palasyo.
* * *
Sa labing uwahing kuwentada, ang sobra nga kuwarta sa PhilHealth niabot na og dul-an sa P500 bilyones. Mas dako kay sa gitakda nga ceiling sa reserve fund nga P470 bilyones, o baleg duha ka tuig nga gasto. Ubos sa balaod, ang sobrang kuwarta sa PhilHealth kinahanglan nga gamiton para sa 112.89 milyones ka sakop (kay ubos sa Universal Health Care Law automatic nga sakop sa PhilHealth ang tanang Pilipino):
Una, pagmenos sa binuwan nga bayranan sa mga sakop; ug
Ikaduha, pagdugang sa mga benepisyo sa mga sakop.
* * *
Imbes ibanan ang premium contribution, gipatas-an ni sa PhilHealth ngadto sa 5% karong 20224. Pero nanlipaghong sa kauwaw ang kadagkoan sa PhilHealth sa nadiskubrehan sa pagtuon sa mga ekonomista sa House of Representatives nga gipangulohan ni Kongresista Stella Quimbo:
Di kinahanglan nga umintohan ang binuwan nga bayranan sa mga sakop sa PhilHealth kay naghinobra ang ilang kita kon ikumparar sa gasto; ug
Angayng dugangan ang mga benepisyo sa mga sakop kay ang ilang nadawat maoy labing kabos sa Southeast Asia.
* * *
Pero lain ang sabaw sa Malakanyang. Kay wa man matuman ang orihinal nga plano pagkuha sa PhilHealth gikan sa DOH, gisukip nila ang nangalisbong probisyon sa nasudnong budget sa 2024 nga ang sobrang kuwarta sa mga koporasyon sa gobiyerno, sama sa PhilHealth, mahimong gamiton sa Malakanyang sa laing katuyoan.
Kon makalusot ning itom nilang plano, ang sobrang kuwarta sa PhilHealth, nga gihikaw gikan sa labing kabos nga mga sakop nga nabalibaran sa ilang batakang panginahanglang medikal, imbes ibalik ngadto nila pinaagi sa dugang mga benepisyo, itunol na hinuon sa balhibuon nga mga kamot sa mga politiko.
* * *
- Latest
