EDITORYAL - Hunahunaa og maayo

Maayong hunahunaon og maayo sa mga magbabalaod ang mga tinguhang usbon ang Konstitusyon aron mabuksan ang dalan para sa mga langyaw nga makatukod og negosyo dinhi pinaagi sa pagpalit og mga luna nga gamiton sa ilang mga negosyo.

Ang Pilipinas dili sama kadako sa ubang mga nasud nga lagpad kaayo og kayutaan nga mamahimong gamiton sa mga negosyo.

Nihit na gani kaayo karon ang mga kalasangan niini nga maoy usa sa proteksyon batok niining negatibong epekto sa climate change, dili na maayong hawanan pa kini aron ibaligya ngadto sa mga langyaw nga gustong magnegosyo dinhi.

Usa pa, kun mahitabo kini pwede kaayong abusohon sa mga langyaw ang mga lagpad nga mapalit nilang luna nga kun mahitabo gyud nga mausab ang balaod pinaagi sa Charter Change, protektado na sila sa halos tanang balaod sa nasud ug dili na basta-basta makapanghilabot ang gobiyerno kun dunay mga kadudahang gipanghimo diha sa sulod sa maong mga luna.

Kun karon palang gani nagkaproblema na sa ubang mga pribadong luna nga gipaabangan sa ngadto sa mga Chinese nationals nga nag-operate og Philippine Overseas Gambling Operation (POGO) nga gihimong salag sa mga kalihokang kriminal sama sa online scamming, human trafficking, gihimong bodega sa mga ilegal nga drugas, samut na tingali kun ilaha na gyud ug titulado sa ilang pangalan ang mga luna.

Labing maayo mao ang pagpaluaw sa kasamtangang balaod, tugotan ang mga langyaw nga negosyante nga makaabang sud sa pipila ka tuig og mga luna para sa ilang negosyo.

Tinuod kinahanglan gyud mangita ang Pilipinas og mga pamaagi aron makadani og mga langyaw nga magpapatigayon, apan dili kinahanglang ibaligya ang nihit na kaayo niining luna ngadto sa mga langyaw.

Adunahan ang mga langyaw, kun mahitabo kini daghang mga Pilipino nga kasamtangang nagpuyo karon sa mga urban areas ang madani unya pagbaligya sa ilang mga luna kay sigurado man gyud nga taas ang palit niini.

Maanam og kahurot og kabaligya ang mga luna, kadtong mga tawong nakipuyo aning mga luna sa gobiyerno asa man ni sila unya dad-on?