Ang balansayon sa pagpuasa Unang bahin

Matud ni San Juan Crisostomo

Basaha: Mateo 4;1-11

Ang Bili sa Pagpuasa wala lamang maglambigit sa pagpugong sa paglikay sa pagkaon sa mga gilagda nga mga panahon (Biyernes Santo, Miyerkoles sa Badlis ug uban pa.) Hinunoa nagpasabot usab kini og pagbiya sa bisan unsang balansayon nga masalaypon. Si bisan kinsa nga nagdahom nga ang balansayon sa puasa diha lamang sa pagdili o paglikay sa pagkaon ang wala makatugkad sa bili niini.

Nagpuasa ka ba? Nan, pamatud-I kini pinaagi sa imong mga maayong buhat. Kun nakita mo ang uban nga nagkinahanglan, kaluy-i siya ug tabangi. Kun ang imong isigkaingon gipasidunggan, ayaw kasina! Ang pagpuasa dili lang pinaagi sa imong baba kondili pinaagi usab sa imong mga mata, sa imong mga dalunggan, sa imong mga tiil, sa imong mga kamot, ug sa bisan asang bahin sa imong lawas.

Makapuasa ang imong mga kamot sa paglikay sa bisan unsang hinakog nga buhat. Ang imong mga tiil makapuasa kun dili nimo tugotan nga molakaw kini padulong sa mga pasundayag ug kalingawan ug kahilayan nga magpalayo kanimo gikan sa Dios. Makapuasa ang imong mga mata kun dili nimo tugotan nga mosud-ong kini sa bisan unsang mga malaw-ay nga talan-awon o ang laksot nga pagtan-aw nimo sa imong isigkaingon. Gidili kining maong mga talan-awon sanglit makadaut man kini alang sa imong kaluwasan. Mag-unsa man tuod ang higpit nga pagpugong sa kaugalingon diha sa pagkaon kun tugotan mo ang imong kaugalingon nga magpabiling nagapos sa mga ginadili ug makalaglag nga mga balansayon.

Dili ka mokaon og karne matud pa. Apan gitugotan mo nga ang imong mga dalunggan mapaminawon sa mga malaw-ay nga mga butang ug hilisgutan. Ang pagpuasa sa mga dalunggan naglambigit usab sa dili pagpaminaw o pagpatalinghog sa mga sayop nga balita ug panahom kalabot sa imong isigkaingon. Mga taho nga pinasikad sa tsismis, tabi tabi nga makadaut sa imong isigkaingon.