Diborsiyo pagpakigbatok sa Ginoo

Sa miaging Domingo, Hunyo 30, 2024, nasingit sa homiliya sa pari ang bahin sa pagmiting sa mga kadagkoan ug kaparian sa Archdiecese of Cebu bahin sa unsa ba gayoy baroganan sa Katolikong simbahan niining nag-ung-ong nga Divorce Bill sa Senado, diin gamay na lamang ang kulang sa pagduso hingpit nang mahimong balaod.

Giklaro sa pari, nga dakong supak ang simbahan niini tungod kay wala lang gub-a ang kasagrado sa kaminyoon sa hingtungdang magtiayon nga gihiusa mismo sa atong Ginoo, kun dili, nakahatag usab og backdoor or loophole (lungag-buslot) nga maoy daling kalutsan sa bisan unsa na lang matang sa pasangil nga maoy hinungdan sa lehitimong panagbulag pinaagi sa pagpayil og diborsiyo.

Nga sa ato pa, bisan unya sa mga ginagmay'ng away ug sa dili pagkasinabtanay, sayonsayonon na lang ang pagsingkasingka ug paggamit sa balaod nga: “Divorce! Karon dayon, makigdiborsiyo ko nimo!” Ang pangutana: Makahatag bag tukmang solusiyon ang divorce?

Sa usa ka sulat ni Cebu Archbishop Jose Palma siya miingon, nga bisan tuod amenado ang Katolikong simbahan sa mga daw dili na maalim ang nagubang kaminyoon, ang simbahan nagpabiling lig-on sa iyang baroganan: “Diborsiyo dili maoy sulbad niini.” Ngano? Tungod kay Ginoo ra gyoy makasulbad sa tanang suliran sa tawo. Kana, kon moduol, mosalig ug mosunod ka lang sa tanan Niyang mga sugo.

Busa, sa naasoy'ng sulat, ang Archbishop kinasingkasing namarayeg: “I appeal to all the faithful of the Archdiocese of Cebu to join hands in our effort to make it known that we do not accept divorce due to the damage it will inflict, not only on us Catholics, but on our values as a nation.”

Unta, makaabot kini ug makasulod sa kasingkasing sa mga pro-Divorce Bill Senators: Risa Hontiveros, Raffy Tulfo, Robinhood Padilla and Imee Marcos ug sila matakdan sa mga anti-Divorce Bill senators: Senate Minority Leader Koko Pimentel, Senators: Nancy Binay, Cynthia Villar, Francis Tolentino ug Sherwin Gatchalian, kinsa bisag mao nay tigpanday og balaod sa nasud, nagpabiling miila-mitahod  sa Sakramento sa Kaminyoon nga inumol sa Diyos, diin dili maayong gub-on, kay ang pagbuhat sa ingon sama ra nga ikaw, tawo, nakigbatok Kaniya.

Hinaot, makapukaw kini sa mga senador nga nakatagpilaw!