Bag-o  nga sekretaryo

Gitudlo ni Presidente Ferdinand R. Marcos Jr. isip bag-o nga Secretary sa Department of Education si Senador Sonny Angara. Ang senador magsugod sa iyang bag-o nga trabaho sugod karong Hulyo 19, 2024. Si Bise Presidente Sara Duterte nga nagsilbing Secretary sa DepEd mobiya na sa iyang katungdanan karong Hulyo 16, 2024.

Ubos sa 1987 nga Batakang Balaud sa nasud, dili puwede nga maghupot og duha ka katungdanan si Senador Sonny Angara tungod kay gikonsiderar nga incompatible nga opisina. Incompatible tungod kay ang pagka senador posisyon nga ubos kin isa lehislatora ug ang pagka secretary sa Department of Education posisyon kini nga ubos sa ehikutibo busa kun ang duha huptan ni Senador Angara makalapas siya sa prinsipyo sa separation of powers sa tulo ka mga sanga sa gobiyerno.

Kay gidawat man sa senador ang pagkatudlo niya isip bag-o nga kalihim sa Department of Education kinahanglan nga biyaan niya ang iyang pagka senador ug motutok sa bago niya nga trabaho.

Si Angara anaa na sa iyang ikaduha nga termino sa pagka senador nga mahuman na karong sunod tuig 2025.

Ang mga senador sa nasud gihatagan lamang og duha ka termino o 12 ka tuig nga pagserbisyo. Human niini dili na sila puwede nga makapapili pag usab pagka senador pero poyde sila nga magpapili sa laing elective position ma national man o ma local.

Mao ni ang akong gituohan nga rason sa Senador pagdawat sa pagtudlo kaniya ni Presidente Marcos isip DepEd Secretary kay mas makadaginot siya sa gasto. Walay gasto ang pagka DepEd secretary tungod kay gitudlo man lang siya. Dili pareha sa pagpapili sa unsa man nga posisyon nga gikinahanglan nga mogasto gayod ang kandidato.

Ang ako lang pangutana, unsa may mahimo ug matabang sa usa ka politiko sa suliran sa edukasyon sa nasud? Paaboton nato ang tubag niini pinaagi sa pagtanaw sa mahimong trabaho sa senador.