Nabuwasot sa ilang lusot
Dihang nikatap sa social media ang reklamo sa mga kustomer batok sa usa ka inilang kan-anan sa Bohol sa niaging buwan, nilusad dayon og imbestigasyon sa Tagbilaran City Hall. Ilang gipasanginlan ang kompaniya nga way business permit sa 2024 ug ni-peke sa ilang mga dokumento sa 2023.
Gipahibawo dayon ni Mayor Jane Cajes-Yap nga iyang gipaseradoan ang restaurant pinaagi sa social media uban ang mga letrato sa mga kawani sa City Hall nga nitaod og dagkong notisya sa nahimong kalapasan sa ganghaan ug bungbong sa kan-anan. Ni-abiba ang netizens.
* * *
Nganong wa man ni himoa sa Philippine Amusement and Gaming Corporation (PAGCOR) sa dihang ilang gikanselar sa niaging tuig ang mga lisensiya sa 256 ka Philippine Offshore Gaming Operators (POGOs)? Mahimong mapasaylo sa paglaktaw sa social media, pero nganong wa man nila pahibaw-a ang lokal nga mga opisyal ug ang kapolisan?
Nganong wa man sab pahibaw-a ang Department of Labor and Employment (DOLE) aron mabakwi ang work permits ug ang Bureau of Immigration aron masusi ang work visas sa langyaw nga mga trabahante sa ilegal na nga POGOs?
* * *
Tungod sa gihimo ni Mayor Yap, nanagana nang tag-iya sa kan-anan sa pagpadayon sa ilang operasyon. Kon nagpaugat sila og lapas sa closure order, ang netizens maoy labing unang magsaba-saba sa social media ug motawag sa atensiyon sa City Hall ug kapolisan.
Tungod sa pagpakahilom sa PAGCOR, mayoriya sa ilegal nga POGOs nipadayon sa paggamit sa samang kahimanan ug mga trabahante. Ug tungod sa kakuwang og kasayuran, hinaot wa mabahini sa dakong kita sa ilegal nga operasyon, gipasagdan lang sila sa kapolisan ug lokal nga mga opisyal.
* * *
Imbes mangayo og pasaylo, ang PAGCOR nigamit sa ilang kapakyas pagbadlong sa ilegal nga POGOs nga rason pagsupak sa kampanya pagkandado sa POGOs. Kay kon tangtangan kuno sa lisensiya ang tanan, apil nang , apil nang 42 nga ilang gitugotan isip internet gaming licensees (IGLs) nga nagbayad og buhis ug nakahatag og kaliboan ka trabaho, peligrong mo-underground ug mas lisod nang badlungon.
Nakabantay tingali sa kataphaw sa ilang lusot, ang PAGCOR nidalidali pag-usab sa ilang linya. Nipasumbingay na nga ang administrasyong Duterte maoy angayng tulisukon sa pagkatap sa mga krimen sa POGOs.
* * *
- Latest
