Makabuot ba ang empliyado kun kanus-a siya mo-overtime sa trabaho?

Dear Atty. Divine,

Aduna koy kauban sa trabaho nga lately nagsige lang og over-time sa opisina. Wa man mi urgent nga trabaho ug wa sab mi deadline apan among namatikdan nga dugay siya mopauli. Ang akong pangutana kun makabuot-buot ba ming mga empliyado sa pag-overtime nga di na manghid sa among labaw? Daghang salamat. -- Tricia

Dear Tricia,

Ang atong balaod nagtakda nga walo ra gyud ka oras ang trabaho sa usa ka trabahante ug kun mosobra gani niini ang oras kinahanglan nga bayran na ang empliyado sa iyang overtime pay. As a general rule, dili sab mapugos ang empliyado sa pag-overtime kun supak sa iyang kabubut-on. Gawas lang kun kini nalakip sa exception nga gilatid sa Article 89 sa atong Labor Code sama panahon sa emergency, or to prevent loss of life or property sama panahon sa sunog, baha, bagyo, linog, epidemya ug uban pang kalamidad, o kun adunay dinalian nga trabaho sa makina, ug sa mga ekipo aron kalikayan ang pagkadaut sa produkto ug pagka-alkanse sa kompaniya, ug uban pa. Apan ang empliyado dili sab makabuot buot sa pag-overtime kun way pagtugot gikan sa iyang employer o sa iyang supervisor. Buot ipasabot nga kinahanglan nga authorized sa employer ang pag-overtime sa empliyado aron siya maka-demand og overtime pay. Thank you and God bless.

Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.