Tatay Digong padayong misulbong

Sa miaging pipila ka bulan dihang miablig bag-on dental clinic ang doktor nga kanhi high school classmate sa akong anak, nagpatsek-ap patambal akong misis bahin sa iyang sakit sa ngipon. Nagkaistorya hinuon mig kadiyot sa iyang ginikanan.

Diay, ilang pamilya taudtaod nang nakaestar og Australia ug dagha’g masulti unsa kalayo ang Pilipinas sa panggobiyerno sa Australia kon disiplina na sa katawhan ang hisgotan. Sanglit, ultimong pagkolektag basura didto gikan sa kabalayan, ang dili makatuman sa mga lagda, otomatik masilota’g multa. Hinungdan, nadisiplina tanang lumolupyo didto. Pero, dinhi sa ato? Pastilan, bisag anaa nay nakapasking gidili ang paglabay og basura, pakalibangan pa hinuog iro! 

Usab, gihisgotan namo ang kalainan sa pagpamunoan ni former President Rodrigo Roa Duterte (FPRRD) ug Presidente Bongbong Marcos (PBBM). Sila dismayado pod sa maot nga pagpanimon ni PBBM. The best gyod kuno si FPRRD.

Sa miaging June 30, 2024 nahimugso ang National Day of Protest. Sa Davao City, SB Park, Batasan, Quezon City, Hong Kong ug uban pang dapit, nagdungan ang mga desenting raliyesta sa pagpasiugdag dakong protest rally sa pulos napunong venues, diin managsamaa rang siyentimento ilang gisinggit-gipalanog: “Marcos, resign!”

Niining samang adlaw, si FPRRD, Davao City Mayor Baste Duterte ug mga kaubanan miadto sa Tacloban City, balwarte sa mga Romualdez, dili aron mamolitika, kondili aron lamang pagtambong og piyesta sumala sa ilang gisaad.

Apan bisan sa pag-adto pa lamang ni FPRRD sa simbahan, misugod na pagdugok ang mga taga Tacloban, kinsa dili gyod mahikalimot sa mga dalayegong pagbaswat ni FPRRD ug Baste kanila niadtong gikay-ag ang kabalayan ug gipasad ang libolibong kinabuhing gipamatay sa bagyong Yolanda, diin wala gyoy Martin Romualdez nga mipatim-aw.

Dili na presidente si Tatay Digong. Pero kining maong situwasiyon nga kon asa siya, o bisan wala iyang lawasnong presensiya sa mga kanhi peaceful rally ug sa miaging National Day of Protest, napuno gihapon ang mga venue sa bagang duot sa katawhan, kinsa magdungan pagsinggit og: “Duterte, Duterte!” nagmatuod lamang kini nga ang trust rating ug impluwensiya ni Tatay Digong sa politika, padayong misulbong.

Ug pagahilatawan, nga dili gyod kini mapugngan sa trying hard kaayong Romualdez-Araneta-Marcos team. Proof? Retired ex-PMA-general mikanta: “The end is near!”