Wa silay interes
Tinuod gyod tingali ang pangangkon ni Bise Presidente Sara Duterte Carpio nga di sila mag-istorya parte sa politika uban sa iyang amahan nga si kanhi Presidente Rodrigo Duterte ug mga igsuon nga silang Kongresista Paolo Duterte ug Davao City Mayor Sebastian Duterte.
Kay niinsistir man siya nga wa mangonsulta sa iyang amahan ug mga igsuon sa iyang desisyon sa pag-resign isip education secretary sa gabinete ni Presidente Ferdinand Marcos Jr. Sama nga nipasabot siya nga wa matuki sa pamilya ang managlahi nilang baruganan parte sa mga gihimo karon sa administrasyon.
* * *
Tinuod gyod tingali nga wa sila maghisgot sa politika bisan sa boluntaryo niyang pagpahibawo sa mga sakop sa media sa Mindanao, bisan way usa nila nga nangutana, nga magdungan pagdagan pagka senador sa eleksiyon sa 2025 ang iyang amahan ug duha ka igsuon.
Kay sa iyang pagduaw sa Sugbo niadtong Biyernes niboluntaryo man sa kasayuran nga ang iyang gikasulti parte sa ilang plano pagdagan pagka senador mao ra ang mga sinaligan sa iyang amahan ug sa iyang manghod. Pero nasipyat pag-angkon nga nakigsulti sa iyang maguwang nga si Paolo.
* * *
Tinuod gyod tingali nga way interes ang ilang pamilya nga maghisgot sa politika kay boluntaryo sab siyang nipahibawo sa mga sakop sa media sa Sugbo nga mokuyog og dagan sa Senado uban sa iyang amahan ug duha ka igsuon ang ubang mga sakop sa Partido Demokratiko Pilipino (PDP) sa iyang amahan.
Kay niangkon nga wa siya makigsulti ni bisan kinsang sakop sa PDP pero ang iyang pangagpas gibase lang sa pagtuo nga suportahan sa partido ang plano sa iyang amahan ug mga igsuon.
* * *
Tinuod gyod tingali nga way apil ang politika sa gi-istoryahan sa ilang pamilya kay ang iyang giaway mao rang operasyon sa kapolisan pagsuway pagdakop ni Apollo Quiboloy di ang nagkabangis nga pagpanghasi sa China sa atong kasundalohan ug mga mangingisda sa West Philippine Sea.
Kay ang iyang gitubag mao ra ang pangutana parte sa uwat sa iyang liog pero “no comment” sa pagpamugos sa administrasyong Marcos sa pagkanta sa Bagong Pilipinas hymn ug paglitok sa Bagong Pilipinas pledge kada isa ug kanaog sa nasudnong bandila sa Lunes ug Biyernes.
- Latest
