Mga giya sa alang sa pagtabang sa biktima

1.Paningkamoti ug seguroha nga ang tanang mga gitahas (assignments) nga gisangon sa biktima iyang nahimo ug nakumpleto. Kini tungod kay ang kapakyas sa pagbuhat sa ingon mamahimong babag sa kaayohan ug kalingkawasa.

Dugang pa, pasidan-i ang biktima sa dakong posibilidad sa panimalos nga pagahimoon sa mga demonyo ngadto kaniya. Kun dili siya magmatngon mas grabe ug kuyaw pa ang iyang mahiagoman sanglit ang mga demonyo mamahimong magdala og laing mga kaubanan nga mas ngil-ad pa kay kanila. (Retaliation).

2. Kinahanglang ang biktima anaa sa kahimtang sa grasya. Kinahanglang motubo ug mohamtong siya diha sa iyang kalambigitan kun relasyon ngadto sa Dios. gikinahanglan ang hustong pag-ebanghelyo (evangelization) pagpasabot ug pagpanudlo kalabot sa iyang kahimtang. Mahinungdanong kabahin kini alang sa kaayohan ug kalingkawasan.

Hinumdomi ang kaayohan ug kalingkawan gikan sa gahum sa kangitngit dili maoy bugtong tumong kondili kini maoy kahimanan lamang aron mas motubo ang hingtungdan sa iyang relasyon sa Dios ug nga mohamtong siya diha sa iyang espirituhanong kinabuhi.

Dugang pa, unta dasigon gyud ang biktima nga magpuyo sa usa ka balaanong kinabuhi sanglit kini man ang iyang panagang ug panalipod batok sa mga pagbanhig ug pag-ataki sa mga demonyo sa umaabot nga mga panahon.

Hinumdomi nga si Kristo Jesus mao ang nitambal ug nipalingkawas dili ang ang eksorsista o ang ministro sa kalingkawasan (Deliverance Minister).

3. Pahinumdomi ang biktima o ang hingtungdan nga ang bisan unsang butang o gimbuhaton nga gisangon ngadto kaniya kinahanglang pagahimoon uban ang debosyon ug pagkamatinud-anon. Dili kini usa ka mahika nga dunay hinanaling resulta. Hinunoa kinahanglan ang iyang atensiyon (Hunahuna) ingon man debosyon (Kasingkasing).

4. Pagtuman sa mga gisangon nga mga buluhaton sama ning mosunod:

· Pagsimba matag adlaw uban ang pag-ampo alang sa kaayohan, kalingkawasan, panalipod alang kanila nga nalambigit sama sa eksorsista, ang biktima ingon man ang pamilya niini, ang mga nitabang panahon sa maong proseso.

· Pagkumpisal ilabina sa mga sala nga dunay kalambigitan sa occult.

· Pagsalikway (Renouncement) ginamit ang ngalan ni Jesus sa kalambigitan ug gibuhat sa biktima ug sa pamilya niini ngadto sa bisan unsang patuo tuo, occult, kasabutan nga ilang gihimo kaniadto. Gikinahanglanon kini aron matangtang ang katungod ug gahum sa yawa ngadto sa biktima gumikan sa pagdangop nila niini makuha lamang ang benepisyo nga ilang gikinahanglan.  Mas maayo nga pagahimoon kini atubangan sa Santisimo Sakramento sa Altar uban ang pagkamatinud-anon, ug kalig-on.

· Ang pagpasaylo. Ang kasilag ug kaligotgot mamahimong ganghaan aron mamahimong makasulod ug makapanghilabot ang mga demonyo sa kinabuhi sa mga hingtungdan. Pasayloon ang si bisan kinsa nga nakapasakit sa biktima. Sila nga nipahamtang sa tunglo, barang, usik ug uban pang kadaut ngadto sa biktima. Iampo ang mapasipalahon aron kini magbag-o ug maghinulsol. Ang pagdumili sa pagpasaylo maoy mamahimong dakong babag alang sa kaayohan ug kalingkawasan. Kinahanglang mopasaylo ang biktima alang sa iyang kalingkawasan ug kalinaw sa hunahuna ug kasingkasing.

· Ang matag adlaw nga konsagrasyon sa kaugalingon ngadto kang Santa Maria Birhen. Mas maayo nga kun ang maong pag-ampo sa konsagrasyon sinulat gyud sa usa ka santos mga (St, Louis de Monfort). Dugang pa, pangayoa ngado sa Mahal nga Birhen ang iyang makanunayong panalipod sa biktima, sa iyang banay ug sa iyang kabtangan.

· Matag adlaw gidapit ang biktima ug ang iyang pamilya nga mag-ampo gyud sa Santos nga Rosaryo ug uban pang mga pag-ampo (Divine Mercy Chaplet, Chaplet of St. Michael the archangel, etc.)

· Sa maampoong paagi, gamiton ang mga sacramental sama sa agua bendita (kun mahimo exorcized) sa pagbendisyon sa lawak, pagdihog sa porma sa krus sa mga agtang sa kabataan ug sakop sa pamilya ginamit ang exorcized oil, ingon man ang pagbutang sa balaang asin (exorcized salt) sa upat ka mga suok sa lawak ug panimalay. pagsul-ob sa medalyon ni San Benito ug eskapularyo sa Mahal nga Birhen sa Carmen (benenditahan).

· Dasigon ang biktima nga dako og tampo ang iyang kaugalingong pagsalmot kun partisipasyon sa proseso alang sa iyang kalingkawasan, kinahanglang himoon niya ang usa ka masubsob nga pag-ampo uban ang pagpaubos nga dunggon sa Dios ang iyang pag-ampo alang sa iyang kaayohan ug kalingkawasan.

Pahinumdom:

Kinahanglang batonan sa biktima, sa iyang pamilya ug ni bisan kinsa kanatong mga binunyagan kining mosunod nga mga teolohikanhong mga birtud.

1. PAGTUO nga ang Dios dili mobiya kanato panahon sa atong panginahanglan.

2. PAGLAUM nga bisan pa man kun dugay ug hinay ang pagkab-ot sa kalingkawasan ug kaayohan, adunay nindot nga giandam ang Dios alang kanato. Matud pa ni San Juan dela Cruz: “ANG KALAG NGA NAKASINATI UG HILABIHANG KANGITNGIT, ANG GIANDAM LAMANG ALANG SA KAHAYAG!”

3. PAGHIGUGMA. Hinumdomi ang pangalagad alang sa Eksorsismo ug Kalingkawasan (Exorcism and Deliverance) dili mahitungod sa presensiya ug mga binuhatan sa yawa, kondili ang maong matang sa pangalagad pagpadayag sa dakong gugma sa Dios alang kanatong iyang mga pinalanggang mga anak.