Pinaka-talamak na online scams
Anim ang pinaka-talamak na online scams, babala ni dating Congressman Kit Belmonte, Convenor ng CitizenWatch Philippines:
l Online shopping scam – pinaka-maraming nabibiktima ng peke o mahinang produkto, ani’y Trade Sec. Fred Pascual. Tiyaking lehitimo ang nagbebenta; dapat may business address, email, at contact number. Mag-ingat sa mamahalin; saliksikin ang presyo. Alamin ku’ng rehistrado ang kumpanya sa website ng Dept. of Trade and Industry.
l Phishing o bank scam – Maging dudoso sa mga texts o email na may pinapa-click na link, tapos hihingi ng personal information. Huwag ipaaalam sa iba ang one time pin o OTP.
l Job scam – Nilalansi ang job hunter na magbayad para sa eksamen at interview. Sinisingil pa ng recruitment fee at pamasahe. ‘Yon pala wala namang naghihintay na trabaho.
l Love scam – Nililigawan ang mga nalulungkot, matanda man o bata. Pinapangakuan ng pag-ibig at kasal. Inuutangan ng malaking halaga. Tapos magtatago na si lover boy o girl.
l Investment scam – Malimit biktimahin ang overseas workers, ani Migrant Workers Sec. Hans Cacdac. Suriin ang pinupuhunanan. Kung sobrang bilis at laki ng kita, baka lokohan.
l Brand impersonation scam – Ginagamit ng online seller ang lehitimo at sikat na brand para maibenta ang sariling produkto.
Idagdag ang mga nanggugulat na text messages. Isang uri nito ang “overdue traffic fine”, kunwari’y mula sa Land Transportation Office o Metro Manila Development Authority. Pagbabayarin ka ng multa. Huwag magpaloko, lalo na kung hindi ka naman nagmamaneho ng sasakyan.
* * *
Makinig sa Sapol, Sabado, 8-10 ng umaga, DWIZ (882-AM).
- Latest
