Katungdanan sa Kristiyanos

Alang kang Presidente Marcos, ang acquittal ni kanhi Senador Leila de Lima sa iyang ulahing kaso usa ka kamatuoran nga naglihok gayod ang sistema sa hustisya sa atong nasud.  Tungod niini, dili na kinahanglan pasudlon pa dinhi sa nasud ang International Criminal Court (ICC) aron mag-imbistigar sa giingon’g mga krimen nga nabuhat sa Duterte administration.  Gisubli usab sa Presidente nga walay hurisdiksyon sa Pilipinas ang ICC.   Consistency o pagka-makanunayon ang gipakita sa presidente ni’ng iyang pamahayag, kinaiya nga angay batonan sa usa ka lider.   Kay ginaingon man nga, “Ang pagkama-kanunayon (consistency) maoy labing una nga katungdanan sa usa ka Kristiyanos”.  Muleeng!

LALISONON PA

Miawhag si Party-list Representative Eddie Villanueva ngadto sa pagatudloon unya sa Pangulo nga kalihim sa edukasyon nga i-display ang “Ten Commandments” sa matag tulonghaan sa tibuok nasud. Gitoohan nga ang maong lakang makapalig-on sa moral fiber sa kabatan-onan ug magtudlo kanila sa kahadlok sa Diyos.  Maanindot ang maong sugyot apan dako pang lalisonon kon makab-ot ba niini ang gimithi’ng katuyoan.  Maglisod man gani og tuman ang tawo bisan gi-summarize na lang ni Ginoong Hesukristo sa duha ang napulo ka sugo; unya di man gani ang mga bata mahadlok sa ilang ginikanan nga makita ug maoy nagpakaon kanila.  Fezteleern!

PAABOTON SA NETFLIX

Motambong si Suspended Cebu City Mayor Michael Rama sa ipahigayon nga mga kalihokan sa Palarong Pambansa 2024 bisan wala siya’y nadawat nga imbitasyon.  Mipasabot si Rama nga labihan ang iyang paningkamot aron masakmit sa Cebu City ang katungod sa pag-host sa maong kalihukan busa dili mahimo nga maghinan-aw lamang siya.  Walay balaod nga nagdili kang Mayor Rama nga motambong sa mga kalihukan ug mga duwa sa Palaro.  Apan alang sa akong amigo, “Ok ra kaayo kon dili siya makatan-aw sa linawas nga pasundayag, kay paaboton na lang kuno niya nga isalida sa Netflix o sa HBO o sa Youtube ba kaha”.  Madahaan!

NAA DIAY AMOTAN?

Gidakop sa mga operatiba sa NBI-Central Visayas Office sa gipahigayon niini nga entrapment operation si Fire Inspector Roy Mat Castro, nga giingon’g nangilkil sa usa ka aplikante sa pagka-bombero og kantidad nga P400,000 bugti sa pagdawat kaniya sa BFP.  Nagmatuod kining panghitabo nga wala’y salaod nga dili pagabayran. 

Makapahinumdom sa aplikante nga sa dihang gipnangutana siya sa manager kon unsay iyang ika-amot alang sa kalambuan sa kompaniya, mitubag hinoon nga, “Aaw, naa diay amotan kon motrabaho dinhi, Sir?”  Pagkatoytoy!

LANGIT UG IMPYERNO

Nasikop sa kapolisan ang 18 anyos nga lalaki nga nagbaligya og illegal nga drugas sa gipahigayon nga buy-bust operation didto sa Barangay Lorega San Miguel, Cebu City.  Giingon nga namaligya og illegal nga drugas ang maong lalaki aron aduna siya’y ikasuporta sa iyang 14 anyos nga hinigugma.

Tungod sa gugma, makahimo ang tawo og dautan nga buhat. Kay lage “Ang gugma mahimo’ng modala kanimo sa langit apan mahimo usab nga moganoy kini kanimo ngadto sa impyerno, sama ni’ng nahitabo sa ulitawo.” Atala lagee!