Maayo pay makighagwa

Sa usa ka press conference uban ni acting vice mayor Dondon Hontiveros, gipahibawo ni suspended mayor Michael Rama nga wa siya imbitaha alang sa kalihukan pagbukas sa Palarong Pambansa 2024 dinhi sa dakbayan sa Sugbo.

Sa samang press conference gipahibawo sab niya nga may imbitasyon o wala motambong siya sa kalihukan.

Alang ni Rama, siya maoy pinili sa katawhan ug may mas labaw'ng katungod pagtambong kay sa acting nga mayor.

Ang tinuod way makapugong ni bisan kinsa, apil ni Rama, nga moadto og mosaksi sa opening sa Palarong Pambansa.

Apan kun moinsister siya nga mosalida sa entablado bisan siya suspendido mora’g lahi na pud na nga estorya.

Mahimo siya nga moadto ug mosaksi sa opening apan di garantiya nga hatagan siya og lingkuranan ibabaw sa entablado uban sa laing mga opisyal labi pa nga gipaabot nga motambong sa maong kalihukan silang Presidente Bongbong Marcos ug Bise Presidente Sara Duterte.

Hinaut dunay makahonghong sa mga higala ni Rama nga di maayo alang niya nga mamugos pagtambong sa kalihukan bisan way imbitasyon.

Bisan respitar nalang sa iyang kaugalingon tungod kay posibleng mauwawan lang siya kun iya ning buhaton tungod sa protocol nga kinahanglang sundon labi pa nga naa ang presidente.

Angayang dawaton na ni Rama ang sakit nga kamatuoran nga di na siyay hari sa syudad karon. Bisan pa og unsaon niya og syagit nga siya maoy pinili sa katawhan dili ni makapausab sa kamatuoran ug realidad nga si acting Mayor Raymond Garcia maoy giila sa balaod nga lihitimong nagdumala sa syudad samtang dili pa mahuman o malibkas ang iyang preventive suspension.

Busa kun akoy Rama maayo pang magpuyo siya sa ilang balay ug makighagwa sa iyang anak ug ni langga.