EDITORYAL - Seryosohon unta ang eco-tourism

Ang mga Pilipino kusog kaayong manghimantay sa uban. Kusog kaayong ikumparar ilang kaugalingon ngadto sa uban ilabi na sa mga langyaw o ubang mga nasud dayun basol sa gobiyerno sa Pilipinas kun nganong lahi ang uban sa ato karon.

Tanang mga tawo sa kalibotan dili gyud kalikayan nga mobati og parehas niini, apan ang nakalahi lang nila sa mga Pilipino, ang mga langyaw ilabi na sa mga taga West makapalambo kanila ug sa ilang lugar ang ilang komentaryo.

Kung ugaling sila manghimantay o manghinaway sa ilang gobiyerno, aduna silay alternatibong sugyot ug andam silang motuman niini para sa kaayohan sa tanan.

Ug labaw sa tanan estrikto sa ubang nasud pagtuman sa ilang mga balaod, nasyonal man o lokal. Mao bisan man tuod og dili sila perpekto, ang mayoriya sa ilang populasyon andam mosakripisyo para tumanon lang ang tanan nilang balaod para sa kaayohan nila.

Dinhi sa Pilipinas, pwerteng panamastamas sa mga tawo sa kalikopan. Angkunon man o dili, bisan mismo ang opisyales sa gobiyerno, lokal man o nasyonal dili gyud tinuoray ug dili seryuso ang ilang pagpanalipod sa kalikopan sa ilang mga lugar.

Ang baskog nga kalasangan ug kadagatan bisan dili kuhaon ang mga kahoy ug mga mananap ihalas niini o mga isda niini makwartahan gihapon pinaagi lang sa pagkuha og mga maayong hulagway o videos niini nga pwedeng mabaligya o pwedeng matan-aw sa mga bisita.

Ang tawag niini eco-tourism o ecological tourism, diin himuong tourist attractions ang mga natural nga kinaiyahan sa usa ka lugar.

Di kinahanglang hilabtan ang natural niining kaanyag aron lang usbon para ‘panindoton sa mga mata sa mga turista. Sama sa nahitabo sa kontrobersiyal nga resort nga gitukod diha sa Chocolate Hills sa Bohol.

Angay ipasigarbo kung unsa ang naa ng daan sa lugar ug amumahon kini aron makaagni pa gyud og daghang turista. Kinahanglan lang nga seryusohon ang pagpatuman sa mga environmental laws ug dili muryo-muryo lang.

Kinahanglang adunay parehong polisiya ang tanang LGUs may labot sa ilang tourists spots aron dili makapalibog sa mga turista aron sila mamalik ug mangagni sa uban.