EDITORYAL - Way kahumanang CCMC

Giawhag karon sa  Konseho sa Dakbayan sa Sugbu si acting mayor Raymond Alvin Garcia nga ipahunong una ang rebidding sa pagpadayon sa konstruksyon sa Cebu City Medical Center tungod sa matud pa mga nanggawas nga pangutana nga kinahanglan una nga matubag.

Ambut kun unsa kadako ang epekto niini sa kaugmaran sa maong tambalanan ug kun makaapektar ba kini sa kasamtangang serbisyo nga nahatag na karon ngadto sa publiko.

Ang CCMC mao ang kinadak-ang tambalanang pangpubliko nga gidumala sa Cebu City. Mao kini dangpanan sa mga kabus nga mga Sugbuanon nga dili kayang makapatambal sa mga pribadong tambalanan tungod sa kamahal. Bisan unsa pay rason o kun unsa pa ka mahinungdanon ang pagkutikuti aning kalamboan sa pag-ugmad sa maong tambalanan, unta, dili kini langayon sa mga hingtungdang mga opisyales sa siyudad.

Kini tungod kay mahikawan gyud ang katawhan sa mga benepisyo ug serbisyong kayang mahatag sa maong pasilidad kun malangan ang paghuman ug pagkompleto sa mga kagamitang medikal sa maong tambalanan.

Ang karaang CCMC gipa-demolis sa panahon ni kanhi mayor Michael Rama niadtong 2014 human nahimo kining peligroso para sa mga pasyente ug medical personnel tungod sa kakaraan na niini ug nakaangkon og mga liki human sa 2013 7.2 magnitude nga linog nga mitay-og sa Sagbayan, Bohol.

Tuig 2015 sa dihang gisugdan ang phase 1 sa konstruksyon sa bag-ong tukoron nga 10-andanang CCMC. Ang konstruksyon niini miagi og daghang isyu ilabi na kabahin sa mga kontraktor nga langay kaayong nakahuman sa target untang panahon.

Sukad niadto, naglain-lain nalang ang mayor sa siyudad gikan ni Rama, mga kanhi mayor Tomas Osmeña ug Edgardo Labella ug karon si acting mayor Raymond Alvin Garcia napud, wala pa gyud gihapon mahuman ang maong tambalanan.

Karon duna napuy panawagan nga hunongon lang una ang rebidding sa pagpadayon sa konstruksyon niini aron klaruhon una ang tanan apil na kun giunsa paggamit ang milyones pesos nga budget pagtukod niini ug daghan pang uban.