Ang kawatan nga wala katilaw og prisohan

Usa ka lalaking mitambong sa haya sa sulod sa usa ka punerarya ang nabukbokan sa mga tawo human nasakpan sa akto nga nangawat og cellphone sa tagtungod sa namatay.

Gani nakuhaan pa gyud og CCTV footage ang krimen nga iyang gihimo.

Nahitabo kini niadtong nalabay’ng semana diin nisabay ang kawatan sa mga tawo nga nibilar sa namatyan ug nikaon pa kini og biskwit ug niinom pa gyud og kape.

Gani sa CCTV wala gyuy kurat nga mora’g feeling close sa mga namatyan.

Modus lang diay kadto niya kay ang tinood niyang tuyo mao man ang pagpangawat.

Maayo gani kay abtik ang mga tawo ug ang mga security guard sa punerarya ug nasakpan ang kawatan ug gitugyan ngadto sa police station 6 sa Cebu City Police Office.

Apan gibuhian ra usab kay wala man mopasaka og kaso ang tagtungod sa biktima kay lagi dili na sila interesado kay hasolan na usab sa proseso ug gawas pa nabalik ra man ang cellphone.

Tungod kay wala may mipasaka og kaso batok sa lalaking suspek napugos pud ang kapolisan sa naasoy’ng estasyonan sa pagbuhi kay lagi basin sila ma-technical ug masumbalikan sa pagreklamo.

Nakasabot kita sa ingon niini nga gihimo sa Station 6. Gusto man nila nga silotan ang suspek apan kutob ra sila sa dahum kay ang pamilya sa biktima dili man interesado sa pagkiha.

Apan dili ba puwede ang mga otoridad mismo ang magsilbeng complainant sa kasong pagpangawat batok sa suspek kay repeat offenders man diay kini o sige nalang og pagpangawat. Gani nakapaskil naman ang nawong niini sa pultahan sa punerarya.

Kong ingon nalang niini ka sayon nga mabuhian ra diay kay walay complainant, kahayahay gyud sa kawatan, padayon sa ilang dautang binuhatan kay dili man makatilaw og prisohan.

Naay usa ka panghitabo nga nakadayeg kaayo ako sa gihimo sa pulis, mismo ang hepe sa Mabolo Police Station nga si Sir Caacoy miingon nga sila gyud ang nangusog sa pagkiha sa usa ka amahan nga nakapatay sa iyang anak nga tampalasan.

Bisan giunsa gani og hangyo sa pamilya sa suspek nga dili nalang ipasaka ang kaso kay miyembro ra man lagi sa pamilya ang nalambigit apan gipatigbabaw sa hepe ang tinguha niya nga mahatagan og hustisya ang nahitabo.

Busa gidayon gyud og sang-at ang kaso ngadto sa piskalya ug depende lang kuno sa fiscal o sa korte kon moabot man ang mahitabo sa kaso.

Lahilahi seguro ang estilo, kon ang uban sama pa lang niining matang sa pulis ka dedicated sa trabaho wala gyuy kriminal nga makalusot.

At least makatilaw gyud og prisohan bahala na kong mabasura sa korte basta gihimo nila ang ilang trabaho. Mao ni ang akong nabiliban sa ingon niini nga mindset sa usa ka public servant.

Hinoon depende man pud na, basin gipatigbabaw lang pud sa kapolisan sa station 6 ang pagsunod sa proseso nga kinahanglan mobarug gyud ang complainant aron sureball ang kalig-on niini inig abot na sa korte.

Pero sa kalig-on sa ebidensya, caught in the act pa ug naa pay saksi segurado gyud nga dunay lugar ang kawatan sa prisohan.