Nganong karon lang

Siyam ka mga kanhi kawani sa City Disaster Risk Reduction and Management Office (CDRRMO) ang miluwat og sinumpaan nga affidavit nga nagtumbok sa ilang labaw nga sila si Joshua “Wawa” Delumbar, Jeve Cadungog, Januar Nino Yap ug Harold Alcontin kinsa mao ang hepe sa Disasters office nga nangawat ug krudo ug gasoline nga gisuplay para sa ilang opisina.

Sa gipanumpaan nga pamahayag nila ni Ronald Hermita, kanhi driver; Alan Opolentisima, Fermin Tabanas, John Justin Rosales, fire engine crew ug Joven Lalimos ilang giingon nga ang tulo ka gihisgotan nga opisyal nangawat og krudo ug gasolina ingon man sa ilang suweldo.

Ang pagbulgar sa anomaliya sa opisina sa disaster natunong gyod pod nga suspendido si Mayor Mike Rama.

Samtang akong gidayeg ang mga kawani nga mibulgar sa anomaliya sa CDRRMO tungod sa ilang kaisog, dili pod nako mapadaplin ang pagpangutana ngadto kanila kun nganong karon pa lang sila nakabaton og kaisog?

Sigun sa ilang pasangil kaniadto pang miaging tuig naghimo og tinonto ang nahisgotang mga opisyal pero karon lang nila kini gibulgar. Nganong wala man sila mobulgar sa anomaliya sa dihang una nila kining nadiskobrihan?

Nganong wala man nila kini itugan ngadto kang Mayor Mike Rama sa dihang wala pa siya masuspenso? Unsa man nahadlok sila ni Mayor Mike? O karon lang sila mibulgar kay dunay tawo nga nag agni kanila ug maoy naghatag nila og kaisog?

Tumong ba sa pagbulgar ang pagpahibalo sa publiko nga adunay anomaliya nga nahitabo sa usa sa buhatan sa City Hall o ang pagdaut ug pagduot sa gisuspensong mayor.

Unsay ilang motibo sa pagbulgar sa anomaliya? Pagpukaw sa mga natulog nga opisyal aron ilang mapakita ang ilang pagpakabana o aron ilang mapakita nga ilang gisanong ang kagustohan sa nagaghat kanila sa pagbulgar sa anomaliya?