EDITORYAL - Piratang CCG

Usa na gyud ka lehitimong pirata ang Chinese Coastguard sa kadagatan sa West Philippine Sea. Pipila ka semana na ang nakalabay sa dihang pugsanon nilang giilog ang mga supply para sa mga tropa sa BRP Sierra Madre sa Ayungin Shoal. Niadtong nakalabay nga adlaw, mas grabe na gyud ilang gibuhat. Sumala pa sa pamahayag sa mga tropa sa Philippine Navy nga maoy giatake sa CCG, nakapaduol na sila sa BRP Sierra Madre aron magdiskarga sa mga supply.

Apan kalit nga nangabot ang walo ka CCG rigid hull inflatable boats ug lain pang mga patrol boats. Diretso lang walay pananghid gibanggaan nila ang mga RHIBs sa PN nga gidala sa Naval Special Operations Group (NAVSOG). Matud pa, armado ang mga Chinese og atsa, sundang, kutsilyo ug gaff (sapang) ug gihulga ang tanang mga sundalo sa NAGSOG.

Gihiktan sa CCG ang usa sa mga NAVSOG RHIB ug giguroy palayo sa BRP Sierra Madre ug didto gibuslot-buslotan ang maong bangka, giguba ang outboard motor niini ug gipanguha ang mga suppy ug gibiyaan.

Atol sa komosyon, usa ka sundalo sa NAVSOG ang naputlan og tudlo samtang nangaangol ang laing pito pa ka sundalo. Gikawat sab nila ang mga armas nga dala sa mga sundalo nga gibutang sa mga gun cases nga gi-dismantle daan.

Makita sa mga nanggawas nga videos ang katampalasan sa CCG. Tipikal nga taktika sa mga pirata sa karaang panahon, tabangan og atake ang biktimang barko ug panguhaon ang mga kargamento niini.

Sa pangutana kun nganong walay nabuhat ang mga sundalong Pilipino, ang tubag duna. Apan makita nga gikuninitan gyud sila sa kadaghan sa mga Chinese nga miatake kanila. Nganong wala man sila pamusila sa mga Pilipino? Anhing dapita na makita ang propesyonalismo sa mga sundalo sa Pilipinas kun itandi sa mga Chinese CG. Sila mga pirata, ang kasundalohan sa Pilipinas dalaygon ang kinaiya ug disiplina.

Pwede kaayong rakrakan sa mga tropa nga naa sa BRP Sierra Madre ang mga CCG niadtong tungora, apan wala kini buhata sa paglikay nga magdako ug mosangpot na gyud hinuon sa giyera.

Sakit man tuod sa buot para sa Pilipinas apan gisakripisyohan kini sa mga sundalong Pilipino didto sa WPS nga dili maguroy ang nasud sa mas dakong giyera.