Kinsay mabulahan sa kagubot?

Gikondenar sa Pentagon ang labing ulahing agresyon sa China batok sa mga Pinoy didto sa West Philippine Sea diin gidasmagan sa barko sa China ang barko sa Pilipinas nga misangpot sa pagkaangol sa usa ka Pinoy nga tripulante.  Alang sa Pentagon, wala kinahanglana kining maong  buhat sa pagpanghagit kay mahimo lang kining hinungdan sa dakong kagubot. Wala kaha sugnori sa US ang dangilag sa kagubot tali sa Pilipinas ug China kay sila man unya ang mabulahan?  Tukma ang panultihon nga, “Ang mga kanasuran sa kalibutan maghisgot lang og kalinaw kon apike ang ilang kahimtang; apan kon makabentaha, maghisgot gilayon sila’g gubat.” Muleeng!

“Mind Your Own Business”

Mipasidaan si Senador Imee Marcos sa katawhang Pilipino nga dili mosalig pag-ayo sa mga impormasyon nga gipakatap sa Amerika kabahin sa labing ulahi nga agresyon nga gihimo sa China didto sa Ayungin Shoal. Dugang pa sa senador, dili angayan manginlabot ug mag-apil-apil pag-ayo ang mga Pinoy ning pagpinuhalay tali sa US ug China.  Lisod sabton ang pasidaan sa senador.  Katawhan baya ang una ug labing apektado ning mga panghitabong agresyon sa China.  Makapahinumdum sa giingon sa akong amigo nga, “Mind your own business; apan ang problema kay wala man ko’y business.” Madahaan!

Sayo nga Mipagarpar

Matud pa sa Bureau of Fisheries and Aquatic Resources (BFAR) walay epekto sa produksyon sa isda ang gipatuman nga “no trespassing policy” sa China diha sa South China Sea kay wala man ilha sa Pilipinas ang maong deklarasyon busa padayon ra gihapon nga makapanagat ang mga Pinoy diha sa West Philippine Sea.  Mora’g sayo ra man kaayo mipagarpar ang BFAR.  Inay magsige og lamlam, angayan tingale nga mangandam ang BFAR kon ugaling tinud-on na sa China ang ilang bahad ug daghan na unya’ng mananagat nga matanggong tungod sa ipatuman nga “no trespassing” policy.  Fezteleern!

Duslitan ang baba

Gipahunong una ni Cebu City Acting Mayor Raymond Alvin Garcia ang pagpanghatag og fuel subsidy ngadto sa tanang City Hall ug barangay vehicles, gawas niadtong giagmit sa emergency ug mga frontline services, tungod sa nadawat niya nga taho nga pagpangawat sa gasolina nga gihimo sa uban’g empleyado sa Disaster Office (CCDRRMO).  Mimando ang acting mayor og imbestigasyon ni’ng giingon’g pagsuyop sa gasolina sa sakyanan.  Kon adunay mapamatud-an nga sad-an, isip silot, angayan nga paugomon og gasolina ang maong mga empleyado ug dayon duslitan ang ilang mga baba.  Pagkatoytoy!

Awhang sa relasyon

Miangkon si Cebu City Acting Mayor Raymond Alvin Garcia nga aduna na’y awhang (gap) sa relasyon tali kanila ni Mayor Mike Rama tungod kay nasagmuyo siya sa daw wala pag-uyon sa naulahi sa iyang mga hukom ug lihok isip acting mayor.  Bisan makapasubo kini sa ilang mga dumadapig, dili kahibudngan kining maong panghitabo.  Magkabuwag man gani ang mga magtiayon, mga politiko pa kaha nga kansang relasyon gibugkos lamang sa maga-usab-usab nila’ng mga politikanhong interest?  Masuta kaha nato ang pormal nga panagbuwag sa adlaw sa pag-file sa Certificate of Candidacy karong Oktubre?  Abangan!