EDITORYAL - Bagong Pilipinas

Kaning bag-ong pagpatuman sa Memorandum Circular No. 52 sa Office of the President miani og daghang opinyon gikan sa publiko nga manggilabuton ug ilabi na sa mga kawani sa gobiyerno sa nagkadaiyang ahensiya ug departamento.

Ang maong memorandum nagmando sa tanang mga institusyon sa gobiyerno; mga state universities and colleges (SUCs);ahensiya sa gobiyerno, mga local government units hasta mga Government Owned and Controlled Corporation (GOCCs) nga kinahanglang awiton ug litukon ang Bagong Pilipinas Hymn ug pagpanumpa para sa nasud.

Sa mga eskuylahan ilabi na sa elementarya, human sa flag raising ceremony litukon sa mga bata ang Panatang Makabayan o pagpanumpa nga mahalon ang nasud sa Pilipinas.

Ang tumong sa maong memorandum matud mao ang pagsilsil sa hunahuna sa tanang Pilipino ang panaad nga suportahan niini ang gobiyerno ug ang nasud.

Sa mga eskuylahan dili kini lisud ipatuman kay kun tumanon man gani nang mga departmental memorandum orders, kana pa hinuong gikan mismo sa presidente.

Mao sab sa mga departamento ug mga ahensiya sa gobiyerno, kinahanglan nila kining tumanon kay silang tanan ubos man sa mandato sa ilang mga labaw nga gikonsiderar nga mga sumusunod ug tigsuporta gyud sa kasamtangang administrasyon, bisan dili pa nila kini gusto.

Anhi sa mga LGUs medyo adunay mga pagkusmod sa mga mayor. Kadtong mga mayor nga dili kapartido sa presidente o sa administrasyon daghan kaayo og kwestyon o bagulbol nga patago kay lagi daw dili na kinahanglan pa.

Dili gyud malikayan ang mga ingon niini nga reaksyon gikan sa pipila ka mga mayor tungod kay hangtud karon, politika pa gihapon ang naa sa ilang hunahuna.

Dili man tingali kinahanglan og dakong budget ang pag-awit ug paglitok aning Bagong Pilipinas, ang angay hunahunaon ang maayong bunga niini sa katawhang Pilipino.