Kinsa ang operator?

Gisuspenso si Cebu City Mayor Mike Rama og unom ka buwan sa Ombudsman tungod sa mga kawani nga wala hatagi sa ilang suweldo. Ning semanaha posible nga ipagawas na pud sa Ombudsman ang laing suspension sa mayor nga molanat og usa ka tuig matud pa sa hunghong sa higala nakong duwende. Kining maong suspension nakabasi sa kasong nepotismo nga gipasaka batok sa mayor.

Ang nagsunod nga suspension dili na kini preventive kun dili silot na gayod. Tungod kay silot posible kini nga may pakapin nga perpetual disqualification sa paghupot og posisyon sa gobiyerno. Sigun sa akong nahibawan ang perpetual disqualification kinahanglan dayon nga ipatuman. Buot ipasabot, bisan moapilar pa ang mayor sa hukom sa Ombudsman ngadto sa taas nga hukmanan, ang iyang perpetual disqualification magpadayon.

Tungod niini posibleng dili na makabalik sa City Hall si Rama. Posible nga dili na siya ang maglingkod nga mayor sa dakbayan sa Sugbo sa pag-abot sa eleksiyon ug posibleng dili na siya makapasubli sa pagpapili pagkamayor sa dakbayan sa Sugbo.

Aduna karon mga pangutana kun kinsa ang operator o nagpaluyo sa pagkasuspenso o pagsuspenso ni Rama. Duha ang tubag ning maong pangutana. Ang unang tubag, ang mayor ra mismo ang operator sa iyang suspension tungod kay nasuspenso siya sa mga sayop niyang binuhatan. Busa ang pagka suspenso sa mayor dili maayo nga ipasangil ngadto sa uban.

Ang ikaduhang tubag, ang suspension sa mayor binuhatan sa mga kontra niya sa politika sa dakbayan ug sa lalawigan sa Sugbo. Ila kining gituyo aron makuhaan og kusog ang mayor aron sa ingon dili magamit niini ang mga kahimanan sa gobiyerno para sa iyang politikanhon nga interest. Ug kun mahimo dili na gayod pabalikon pa sa serbisyo si Rama. Asa kaha ang sakto ning duha ka tubag?