Kinsa ang palpak?

Nadismaya kaayo si Senador Sherwin Gatchalian sa kadagkoan sa National Telecommunications Commission (NTC) kay wa nila   masumpo ang mga scammers nga sagad namiktima og cellphone subscribers.

Matud sa senador nga nahimo na ang Republic Act 11934 kun SIM Registration Act nga mailhan na gyud unta kon kinsa ang mga tag-iya sa Simpak nga gigamit sa mga scammers, apan ang NTC daw sa wa lay gihimo.

Bisan ako makaingon nga naghago-hago lang sa mga tawo kadtong pagpangrehistro sa mga Simpak kay bisan og mailhan na unta ang mga tag-iya sa Simpak nga gigamit sa binuang, wa ra may gihimo ang kadagkoan sa NTC.

Ang kadagkoan sa NTC dinhi sa Central Visayas miangkon nga ang tanang Simpak nga gigamit karon pulos na rehistrado ug mailhan na gyud kon kinsa ang nagrehistro niini, kon sutaon lang gyud.

Apan unsaon, matud sa kadagkoan sa NTC nga “kuwang kuno og ngipon” ang RA 11934 kay samtang nagmando kini nga irehistro na gyud ang mga Simpak, wa hatagi og gahum ang NTC nga mopugos sa mga Telcos, sama sa Globe, PLDT, ug Dito, nga mohatag kanila sa nga’n sa mga tag-iya sa Simpak.

Buyno, kon ingon man gani niana, nagnong wa may taga NTC nga mipadala og suwat ngadto sa main proponent niining mao nga balaod, o kaha nagsuwat sila direkta sa House Speaker aron kahimoan kini og “ngipon?”

Basin baya og kutob ra ta sa komentaryo kon pangutan-on sa media, apan wa gyuy gihimo nga lakang aron hingpit nga mapatuman ang maong balaod. Siyaro, wa diay taga NTC nga gipatawag sa mga kongresista paghimo niining balaura?

Kon gipatawag man sila, mihatag kaha sila og sugyot nga ibutang sa balaod nga silang taga NTC hatagan og gahum nga inigpangayo nila sa mga Telcos sa nga’n sa mga Simpak registrants, mohatag dayon sila?

Pananglit kon ako pa maoy opisyal sa NTC, suwatan dayon nako ang main proponent sa maong balaod, o kaha makigkita ko sa House Speaker aron ipadayag ang maong problema nga matud nila kuwang sila og “ngipon.”

Makalagot kaayo uy, nga hangtud karon daghan gihapon ang mga scammers nga way kahadlok nga sila masakpan sa paghimo og binuang, kay miangkon man ang taga NTC nga dili nila mapugos ang Telcos paghatag kanila’g ngan sa tag-iya sa mga Simpak.

Sayonan ka nga ingnon lang ka sa NTC nga kon may reklamo ta batok sa usa ka scammer, mopasaka ra kuno ta og kaso didto sa korte, aron ang hukmanan na maoy momando sa Telcom nga ihatag ang ngan sa Simpak registered owner.

Husto kaha na?