Pag-disiplina sa driver tumong sa pagpausbaw sa multa sa traffic violations

CEBU, Philippines — Ang gitinguha nga pagpausbaw gikan 50 porsiyento ngadto na sa 200 porsiyento sa multa sa kalapasan sa trapiko maoy paagi sa pagdisiplina sa mga drayber.

Kini maoy unod sa ordinansahon nga gipangamhanan ni Konsehal Jimmy Lumapas, chairman sa transportasyon sa konseho sa siyudad sa Mandaue.

Ang maong ordinansahon ang natuki na sa ikaduhang higayon sa regular session sa konseho niadtong Hunyo 10,2024 isip pagsanong sa sugyot sa buhatan sa Traffic Enforcement Agency of Mandaue kun TEAM.

Gitinguha ang pag-amendar sa gipatuman nga ordinansa nga nagpahamtang og multa sa kalapasan sa gilatid nga mga lagda sa trapiko isip paagi sa pagdisiplina sa mga driver.

Si Hyll Retuya, Assistant   Department Head sa TEAM miingon sa matag adlaw adunay 150 ngadto sa 200 ka mga drayber ang maisyuhan og citation ticket nga ang multa mokabat usab sa P3 milyones.

Gipasabot ni Retuya nga ang kitaong salapi gikan sa multa sa nakalapas nga mga drayber magamit usab sa mga programa sa pagpalambo sa kahimtang sa trapiko sa dakbayan.

Gituohan nga tungod sa usbaw sa multa daghan na sa mga drayber ang mag-amping sa ilang pagmaneho sa paglikay nga makalapas sa lagda sa trapiko. Romeo T. Limpangog/MEL

Ang gipahigayon nga kalihukan atol sa World Blood Donor Day diha sa Hoops Dome, siyudad sa Lapu-Lapu kagahapon. (BANAT NEWS)