Demalas nga gingharian
Dihay usa ka gingharian nga nabantog sa way kinutoban nga pagkaguba sa iyang kadalanan. Di makasutoy ang mga sakyanan. Kada pila ka dupa dunay hunonganan. Kinahanglan nga magpuli-puli sa agianan. Kasagaran ra ba sa paghuwat siyam-siyaman. Kay wa lagi kahumanan ang pagkagusbat sa ilang kadalanan.
Bisan unsa lay hinungdan. Maproblema dayon ang kadalanan. Mabuslot sa gamay nga uwan. Bisan ang pagligid sa pila lang ka buwan. Makamugna og mga libaong nga kaliboan. Di mahimo nga likayan ang tanan. Kuyaw nga mabangga sa naglikay-likay sab nga kasugat nga mga sakyanan.
* * *
Dunay pagduda ang mga molupyo sa gingharian. Nga tinuyo ang way kataposan nga kahasol sa ilang kadalanan. Kay kada ayo mahimo man nga panguwartahan:
• Gawas nga gilasaw ang aspalto ug semento, ang bas ug graba mahimo sab nga sa ampaw gisagolan;
• Wa apuraha ang pag-ayo kay gihimong pasumangil nga ang kadagkoan naglihok para sa katawhan; ug
• Bisan ang kadalanan nga natsambahan, mas dugay nga naguba kay sa uban, tuyuon na lang og lungag aron nga may rason nga sa nipis nga aspalto o semento ug sa baga nga komisyon masapawan.
* * *
Niinsistir sab ang mga magbubuhis nga kining lain nilang pagduda dunay sukaranan:
• Nga ang way kinutoban nga pagkaguba sa ilang kadalanan dunay lig-on nga kalambigitan;
• Sa kanunay nga pagbiyahe sa ilang kadagkoan ngadto sa lagyo nga kanasuran;
• Diin ang paborito nilang mga kontraktor sa mga proyekto maoy gikauban;
• Gidudahan nga maoy nag-abaga sa tanan nila nga mga gastohan;
• Ginamit ang kuwarta nga para unta itiwas sa way kahumanan nga pag-ayo sa ilang kadalanan.
* * *
Pero ang mga molupyo wa mangandoy og kausaban. Hagbay rang nitahan sa giisip nga ilang kapalaran. Magpabilin sa gahom ang mga labing mapahimuslanon sa katungdanan ug labing kawatan. Kay tanan nilang atraso sa kalit lang makalimtan. Sa adlaw sa eleksiyon nga pinalitay sa boto ang pasiugdahan.
Mao nga makaluluoy ang mga molupyo ning demalas nga gingharian. Gawas nga nag-ilaid sa grabe nga kalisdanan, puno sa way kataposan nga kahasol sa ilang kadalanan, nahiagom pa gyod sa higante nga kauwawan: Sila ang labing adunahan nga gingharian, pero ang ilang mga kabos ug mga gipanggutom mao sab ang labing daghan.
* * *
- Latest
