EDITORYAL - PHL No.1 sa basurang plastik

Ang plastic nga basura usa sa nag-unang polusyon sa kalibutan. Ang Pilipinas ikatulo sa tibuok kalibotan sa kontribyutor sa maong polusyon diha sa kadagatan sumala pa sa Department of Environment and Natural Resources base sa gihimong pagtuon sa World Bank niadtong tuig 2021.

Apan si DENR  Undersecretary Jonas Leones dili makatuo sa maong pagtuon sa WB, kay para niya ang populasyon sa nasud nga 130 milyones lang ikumparar sa mas dagkong mga nasud.

Usa sa mga nakitang rason, kuwang og sanitary landfills, lugak ang tanang sektor pagtuman sa Waste Management Act, mga rekisitos nga nakapaluya sa mga gustong magtukod og sanitary landfills, mga material recovery facilities ug recycling plants. Ang resulta, daghan sa mga basurang plastik ilabi na kadtong mga single-use plastic napadung sa kadagatan.

Matud pa sa DENR kada adlaw 163 metriko toneladang plastic ang gi-prodyus sa nasud, 33 porsiyento niini basurang napadulong sa landfills ug dumpsites, apan 35 porsiyento napadung sa kadagatan o sa bisan asa.

Apan sa 2021 Science Advances study, ang Pilipinas maoy numero unong source sa basurang plastik sa kadagatan sa tibuok kalibotan.  Ang UN Environment Programme, mibanabana nga 75 ngadto 199 milyones toneladang basurang plastic ang napunta sa kadagatan.  Nakaguba kini sa marine ecosystems, nakahatag og negatibong epekto sa ekonomiya sa nasud ilabi na sa fishing, tourism, ug shipping industries.

Sumala pa sa maong pagtuon, sa top 10 ka nasud nga tigyabo og basura sa kadagatan, ang Pilipinas mao ang nag-una sa 356,371 metric tons nga basurang plastik; sunod ang India (126,513 MT); Malaysia (73,098 MT); China (70,707 MT); Indonesia (56,333 MT); Myanmar (40,000 MT); Brazil (37,799 MT); Vietnam (28,221 MT); Bangladesh (24,640 MT); ug Thailand (22,806 MT)2. Gawas sa Brazil, ang tanang nabutang sa lista mga “developing nations sa Asya.”

Nakita sab sa research nga ang mga nasud nga gagmay lang og kayutaan, tag-as nga baybayon, pirmeng dunay uwan, kuwang og waste management infrastructures, kasagaran sa dagat padung ang basura nga sama og sitwasyon sa Pilipinas. Sumala pa sa World Population Review, ang US maoy nag-una tibuok kalibotan sa tig-prodyus og plastic nga basura, sunod ang India, China ,  Brazil, Indonesia, Russia, Germany, UK, Mexico ug Japan.

Apan sa ilang tanan, ang US, Russia, Germany, Russia, UK, Japan ug Mexico mga nasud kini nga dunay epektibong waste management ug daghan og plastic recycling plants.