Lawas ra ang puhonan busa ampingan gyud

Usa ka 32-anyos nga food delivery rider ang nakabsan gyud sa iyang kinabuhi human nakuyapan samtang nagmaneho sa iyang motorsiklo atol sa iyang pag-duty sa trabaho didto sa sitio Tigbao, Barangay Talamban dakbayan sa Sugbo niadtong Martes alas onse na sa buntag.

Gitabang siya sa usa ka babayeng nakasunod kaniya mora'g nurse man seguro siya kay suheto kaayo man pagluwas sa kinabuhi sama sa paghimo sa CPR ug wala gyud niya biyai hangtud nakaabot ang ambulansiya apan subo nga palandungon kay dead on arrival ang driver.

Matud sa pamilya atake sa kasingkasing ang hinungdan sa kamatayon niini base usab sa medical record nga gipagawas sa tambalanan. Apan dili sila makatuo kay himsog man kini ug sukad ma sukad wala may gipamati sa lawas ang anak.

Hinuon tungod sa kakugihan niini halos mag-overtime kanunay tungod og alang sa iyang asawa ug duha ka mga anak nga mga gagmay pa, buntag sayo mogikan sa balay kay manginabuhi ug mopauli alas onse na sa gabii.

Uwan init ang iyang sagubangon mapasmohan pa kay malimot usahay sa pagkaon tungod sa paningkamot.

Gawas pa posible usab kuno nga ang nanghinubrang kainit sa panahon ang nakatampo sa nasinating krisis sa panglawas sa driver kay hilabihan ka baga sa ilang uniporme ug fullface helmet pa gyud ang ilang gigamit nga halos na gani dili makaginhawa.

Naatlan nako ang pagtabang sa driver kay padung man mi niadtong panahona sa Pulangbato sa laing coverage, nasayran nako nga naningkamot intawon sa pagwakis sa helmet ang driver aron siya makaginhawa.

Nasayran usab nako gikan sa pamilya nga duna diay quota ang kompaniya nga gialagaran sa driver maong aboton gyud niya nga maoy hinungdan nga madugay kini sa pagpauli ug kapoy na kaayo ang lawas apan walay mahimo kay mao ra man usab kini ang ilang gisaligan.

Usa kini ka pahigmata sa uban nga ampingan gyud ang lawas kay alang ra usab kini sa atong mga mahal sa kinabuhi nga nagsalig kanato, bisan unsaon nato pagpaningkamot aron makahatag kita sa gikinahanglan sa atong pamilya apan kong dili kita mag amping sa atong lawas gihapon mopauli.

Busa ampingan nato ang atong panglawas tungod ug alang sa atong mga mahal sa kinabuhi.