EDITORYAL - Market denial

Dunay gisakmit nga 270 ka kilong pinabuthang isda ang mga sakop sa Cebu City Department of Veterinary Medicine and Fisheries niadtong Martes sa kaadlawon nga maoy sagad sa pagabot-abot sa mga isda gikan sa nagkadaiyang dapit sa Kabisay-an.

Maayo nga gibalik na kini nga matang sa operasyon kay pila na man ka mga tuig ang nakalabay wala naman igdungog ang mga ingon niini nga operasyon diha sa Pasil Fish Port ug sa Carbon Public Market. Pipila ka tuig na ang nakalabay sa dihang gilusad ang subsob nga operasyon nga gitawag og “market denial” ni anhing Jojo dela Victoria batok sa mga isdang gikuha pinaagi sa ilegal nga pamaagi.

Aktibo kaayo siya kaniadto batok niini sa katuyoan nga mahunong na kining ilegal nga matang sa pangisda.

Kay kun walay merkado nga modawat sa mga isdang nakuha pinaagi sa ilegal nga pamaagi, naglaum si dela Victoria nga mohunong na sab ang mga mananagat sa paggamit og ilegal nga pamaagi pagkuha og isda sama sa dynamite fishing ug pino kaayong pukot.

Tuod man, dako kaayo kadtong og positibong epekto. Ang mga isda nga mapalit sa kamerkadohan, dili bungkag ang sud sa tiyan nga maoy epekto aning dinamita. Apan tungod sab sa pagkugi ni dela Victoria, gipatay kini.

Si Dr. Alice Utlang sa dihang maoy natudlo kaniadto nga pangulo sa DVMF misunod sab niini. Daghan siyang nahimo para sa mga pumapalit ug sa mismong mga vendors kay siguro man gyud nga presko ang mga karne ug isda nga baligya.

Apan nahunong siya sa dihang gibalhin siya og laing departamento (kay di kapartido?), karon paglabay sa pipila ka tuig gibalik siya sa DVMF ug maayo nga iyahang gibalik ang market denial operation inabagan sa Bureau of Fisheries and Aquatic Resources ug  kapolisan.

Kaning market denial pagtabang kini sa tanan, para sa mga mananagat, para sa mga fish dealers ug vendors, para sa mga konsumidor ug labaw sa tanan para sa pagsigurong dili mahurot ang fish stocks sa kadagatan.

Kun dili gamitan og ilegal nga pamaagi sa pagkuha ang mga isda, gi-regulate ug gi-report ang kuha matag adlaw, mamonitor kanunay ang kabaskog sa kadagatan sa Central Visayas.