Husto na ang pagpakaaron-ingnon

Dili dautan ang makighigala ug gani usa ni sa mga maayong hiyas natong mga Pilipino—ang pagkamahigalaon.

Apan dili sa tanang higayon ug panahon maayo ang pagpakighigala. Dunay panahon nga gikinahanglang butangan og utlanan ang pakighigala—kana kun tumban na ang imong dignidad ug pagkatawo.

Dili ba hanggaw ang tawag sa usa ka tawo nga bisan giyatakan ang iyang katungod ug giilogan sa mga butang nga iyang gipanag-iya magpadayon gihapon sa pagpakighigala sa tawo nga way respito kaniya?

Daghan sa atong katiguwangan, inila ug dili, ang miula sa ilang dugo aron makab-ot ang atong kaugalingnan (Independence). Sila nakigbatok sa mga langyaw nga buot moilog sa yuta tang natawhan.

Niining panahon sa kabag-ohan, seryoso ang hulga sa atong kaugalingnan gikan sa mga tawo nga nagtakuban ug nagpakaaron-ingnong higala. Abunda ang mga timailhan nga ang China dili tinuod nga amigo sa Pilipinas, hinonoa wa siyay kalainan sa mga mananakop sa kanhiay’ng panahon.

Way tinuod nga higala nga mangangkon sa teritoryo sa iyang amigo. Ug way amigo nga manaogdaog sa way dag-anan niyang higala. Ang tinuod nga amigo motabang ug morespito sa teritoryo sa iyang higala.

Gipahimuslan sa China ang iyang pagkagamhanan aron ilogon ang teritoryong dili ila sa way pagtahod sa desisyon sa international arbitral tribunal. Gamit ang ilang bahandi ug makinarya sa media ilang gilusad ang lapad nga propaganda paglingla sa ilang kaugalingong mga mga mulopyo ug sa kalibutan aron patuohon sa bakak nilang pangangkon.

Pinaagi sa media nga kontrolado sa ilang gobiyerno, gisuwayan nila’g patuo ang kalibutan nga ang Pilipinas maoy nagsubi-subi ug nangilog sa ilang teritoryo bisan kun dayag ug tataw ang hukom sa arbitral tribunal.

Ilang gustong patuohon ang kalibutan nga ang mga tensiyon nga nanghitabo sa West Philippine Sea, sama sa pagbombardiyo sa ilang mga barko sa Coast Guard gamit ang water cannon sa atong mga sakyanan nga maghatod og supply sa mga sundawo nga nadistino sa BRP Sierra Madre, atong sayop tungod sa atong pagpanghagit nila.

Husto na, tama na! Panahon na nga hunongon ang pagpakaaron ingnon nga sila atong higala.  Wala ni magpasabot nga makiggubat ta nila tungod kay bisan sa damgo wa tay dag-anan kun armadong pwersa ang hisgutan.

Apan dunay mga paagi nga mahimong atong sugdan sa atong kaugalingon pinaagi sa pag-boycott sa ilang mga produkto.