Mobawos gani ang binugha

Matud ni Presidente Marcos, kinahanglan nga kanunay’ng andam ang Pilipinas tungod sa nagkadaghan nga mga hulga gumikan sa nagkataas nga geopolitical tension sa Indo-Pacific region nga naghatag na og tumang kabalaka kanato.  Sa padayon nga pagpang-harass kanato sa China, tukma ang awhag sa Presidente nga mangandam.  Dili man tinuod kita mahimong mouna  pagpakig-anduhay sa China apan dili usab mahimo nga dili kita mopakita’g pagtugbang kon maghinobra na unya ang ilang pagpang-harass kanato.  Mao na’y giingon nga “Mobawos man gani ang binugha, ang Pinoy pa kaha!”.  Muleeng!

Pangilad panahon sa eleksyon

Usa ka magpapatigayon nga naka-base sa New York, nga si Omar Khan, ang gihukman nga mabilanggo ug gimandoan usab sa pagbayad og 6 milyones dolyares balik ngadto sa iyang mga nabiktima.  Gigamit ni Khan ang modus nga wine-and dine scheme, diin iyang busgon ug hubgon ang iyang biktimahonon ug tanyagan gilayon og mga peke nga investment scheme.   Dinhi sa Pilipinas, adunay matang sa pagpangilad nga gibuhat matag eleksyon.  Wala pa’y nasilotan kanila, hinonoa, nahimo hinoon sila nga mga kongresista, senador, gobernador ug mayor.    Haum kanila ang panultihon nga “Ang tanan mailad basta maantigo lang gyud ang mangingilad”. Fezteleern!

Mahanaw nga hanggaw

Alang kang Senate President Francis Escudero, kinahanglan pa nga amendahan ang Flag ang Heraldic Code of the Philippines una pa mapatuman ang mandatory nga pag-awit sa himno nga Bagong Pilipinas sa tanan’g buhatan ug sanga sa gobyerno.  Bisan sa pagkanta sa himno nga gitumong unta sa pagsilsil sa atong hunahuna ug kasingkasing sa mga prinsipyo sa bag-ong pangagamhanan ug liderato, wala gihapon kita magkahiusa.  Labon sa videokehan, mag-ilogay kita’g hawid sa microphone kay tanan buot mo-awit.  Angayan na nato’ng tamdan ang panultihon nga, “Kinahanglan nga makat-on na kita pagkinabuhi isip managsoon, kay kon dili, mangahanaw lang kita nga daw mga hanggaw”.  Madahaan!

Tinabal nga tawo?

Gipahibalo sa Industrial Technology Development Institute sa DOST nga naka-mugna kini og flavored salt ug seasoning isip kabahin sa ilang paningkamot sa pag-revitalize sa industriya sa asin sa atong nasud.  Tinuod nga daghan ang kagamitan dili lang sa pagtimpla sa sud-an kon dili sa pagbuhat usab ug mga sabon ug chemical.  Aduna pa’y lain nga mahinungdanon’g gamit ang asin nga gi-base sa kustombre labi na sa mga lumolupyo sa Sagada sa Mountain Province.  Kini mao ang pag-“tabal” sa minatay aron dili dali madugta og manimaho.  Atala lagee!

Nasilag sa maanyag

Gisikop sa kapolisan si Alvin Catalan, 37 anyos nga taga-Ubay, Bohol, tungod sa sala nga pagpanukmag sa tulo ka mga “maanyag nga babaye”.  Nasayran gikan sa suspetsado nga maglagot kuno siya kon makakita og maanyag nga babaye kay nagtoo siya nga peke ang kaanyag niini.  Daghan na tinuod karon nga mga babaye kon sud-ongon apan lalake diay kon hinolon.  Apan lahi si Catalan nga matang sa pagka-lalake kay samtang ang uban malipay kon pasanginlan nga uyab niya ang iyang katapad nga babaye, kini siya magsipok man hinoon ang ulo kon adunay makita nga gwapa’ng babaye.  Pagkatoytoy!