P15 milyon nga health facility sa Apas gibuksan na

CEBU, Philippines — Gikatakdang buksan na ang Super Family Health Center diha sa Barangay Apas, Dakbayan sa Sugbo diin ang maong pasilidad mo duha katuig na kining nahuman apan wala pa magamit.

Ang maong P15 million project, proyekto kini nga gipundohan sa Department of Health nga nahimutang sa Barangay Apas ug nahuman sa pagtukod sa wala pa mapupos ang target completion niini matud ni Piege Uy, contractor sa proyekto.

Ug gumikan kay wala magamit sulod sa pipila ka tuig ang maong proyekto hinungdan nga aduna na kini nangaguba.

Apan isip kabahin sa ilang corporate social responsibilities ilahang ayohon ang mga nangaguba nga wala nay gastohon ang siyudad. Nasayran nga ang maong proyekto wala mahatagi og certificate of occupancy tungod kay wala usab kini mahatagi og building permit.

Si Matt Serana, MILO coordinator ug maoy nag-facilitate sa proyekto kaniadto nagkanayon nga nalangay ang clearance gikan sa barangay nga gipangayo nga maoy usa sa mga rekisitos sa pagpangayo og building permit hinuon napahimutang na ang tanan ug mamahimo nang magamit ang building.

Si Acting Cebu City Mayor Raymond Alvin Garcia ang nisusi sa pasilidad ug nihatagan kini og deadline hangtud sa Hunyo 28, 2024 nga maablihan na kini.

Ang Cebu City Health Department mao ang mo dumala sa pasilidad isip kabahin usab sa Universal Health Care program sa gobiyerno. (Jessa Grezil Bacus, CNU Intern/BDB) BANAT NEWS