EDITORYAL - Ayuda para sa tinuod nagkinahanglan

Nag-abut abot ang mga hinabang para sa mga nabiktima sa pagbuto sa bulkang Kanlaon sa isla sa Negros. Samtang tuod dili sama sa kakusog sa pagbuto sa bulkang Pinatubo niadtong dekada 90, duna gyuy gatosan ka pamilyang naapektahan.

Naapektahan sila tungod sa ashfalls ug lahar nga nidagayday sa ilang mga kasapaan, ug naapektahan sab ang mga pananom.

Apan base sa impormasyon gikan sa The Freeman/Banat News photographer nga gipadala didto, wala ra kaayo maapektahi ang mga lugar sa habig sa Negros Oriental.

Makita gani sa iyang mga kuhang hulagway ilabi na sa Canlaon City ang abunda kaayong abot sa mga mag-uuma.

Ang mga maguuma padayon gani sa ilang mga pagpananom ug pagtikad sa ilang umahan, nagpasabot lang kini nga samtang naapektahan ang ubang Negrenses diha sa pikas nga bahin sa Kanlaon, wala sila makasinati og samang kalisdanan.

Kay sagad sa lahar ug ashfalls adto napunta sa mga lungsod sa habig sa Negros Occidental. Mao nga niadtong adlaw nga Biyernes, gipahiklin sa mas luwas nga mga lugar ang mga molupyo sa lima ka mga barangay sa lungsod sa La Castellana tungod sa peligrong dala sa lahar.

Ang lahar mao ang mga abo gikan sa bulkan nga nabasa ug gianod sa uwan adiha agi sa mga sapa. Gawas nga peligro kini sa tawo, peligro sab ang lahar sa mga kinabuhi diha sa sapa sama sa mga isda tungod kay kaning lahar nagdala man o asupre o sulfur.

Gawas sa mga sapa, ang mga pananom sa mga lungsod sa habig sa Negros Occidental duol sa Kanlaon natabunan aning abo hinungdan nga naapektahan gyud ang ilang mga kinabuhi didto.

Kagahapong adlawa, si acting Cebu City Mayor Raymond Alvin Garcia miaprubar sa P7 million financial assistance alang sa mga local government units (LGU) nga naapektahan sa maong pagbuto sa bulkan.

Ang planong hatagan niini mao ang Bago City, La Carlota, La Castellana, Moises Padilla, Pontivedra,nga tag P1 million  samtang P2 million City of Canlaon.

Hinuon, walay makadiktar kun kinsa ang gustong tabangan sa Cebu City, apan mas labing maayo kun kadtong mga LGUs nga mas nagkinahanglan niining ayuda tingali maoy hatagan.