Atraso sa mga kahoy
Angay’ng pasidunggan ang desisyon sa Cebu City Council sa pagbasura sa plano nga pagputol sa mga kahoy sa Barangay Banilad. Sa pikas nga bahin, angayng mauwaw ang demolition team sa City Hall nga nirekomendar nga purilon ang mga punoan sa kahoy sa center island A.S. Fortuna St.
Ang desisyon sa mga konsehal gipasikad sa makiangayon nga rekomendasyon sa Cebu City Environment and Natural Resource (CCENRO) nga imbes putlon ang mga kahoy angay pa hinuon nga dugangan og mga punoan sa kahoy nga lumad ug haom sa kinaiyahan sa Sugbo.
* * *
Morang sablig sa makahupay nga uwan sa habagat ang baruganan sa City Council human sa sunudsunod nga El Niño sa bangis nga mga pagpanamastamas sa atong palibot nga gipasiugdahan sa ubang local government units, apil nang:
Pag-upaw ug pagpatag sa kabukiran sa Balamban nga tukoran sa bag-ong Cebu Capitol building nga way environmental compliance certificate (ECC);
Pagputol sa mga punoan sa kahoy para sa road expansion project sa Camotes nga, nakatag-an ka, way ECC; ug
Pagtukod og resorts sud sa Chocolate Hills sa Sagbayan ug ubang bahin sa Bohol.
* * *
Lisod sabton ang awhag sa Cebu City Prevention, Restoration, Order, Beautification and Enhancement (PROBE)-South Executive Director Kevin Anthony Sanchez sa pagputol sa mga punoan sa kahoy. Ambot unsay atraso sa mga kahoy nga iyang gipasanginlang nakahasol sa mga motorista ug nakapalaksot sa palibot.
Napamatud-an sa inspeksiyon sa CCENRO nga, sukwahi sa pagkondenar ni Sanchez, ang mga kahoy wa makahatag og risgo sa trapiko, maisugon nga nisungasong sa huwaw ug manggihagon sa lapad nilang landong ug makahupay nga huyuhoy.
* * *
Imbes apikihon ang mga kahoy, mangahas mi og sugyot sa demolition team nga ilang hawanan ang syudad gikan sa ilegal nga mga istruktura nga nakahasol sa trapiko ug nakahulga sa kinaiyahan. Among gipasabot ang higanteng mga negosyo nga nitabon sa kasapaan, nikagis sa kabukiran ug niiban sa kadalanan.
Gawas sa nagkasungi nilang papel sa kalikopan, lain nilang kalainan mao nga ang kabos nga mga punoan sa kahoy way tigpanalipod gawas sa utrong nameligro nga mga langgam ug environmentalists, pero ang mga istruktura giduphan sa mga negosyanteng dagko og amot sa kampanya sa mga politiko.
* * *
- Latest
