Pagdumili

Maayong Balita

Bisan pa man kun tataw na kaayo ang gipakita nga mga milagro sa atong Ginoo lakip na niini ang paghingilin sa mga yawa daghanan gihapon ang nagdumili sa pagtuo kaniya.

Kay kinsa ra gud siya nga angayang tuohan? Anak og Panday? Walay gieskwelahan? Mao nga ang mga kasingkasing sa mga kadagkoan ingon man sa mga magtutudlo sa balaod ang nahimong tig-a ug nagdumili gyud sa pagtuo.

Usa dakong pagpakabuta bungol sa kamatuoran. Kini dili gyud mapasaylo. Nipasulabi na hinuon ang pagduda o dili ba kaha bias batok kang Jesus.

Kasintian

Sa atong kinabuhi sa makadaghan kita nahimong nabutaan sa kamatuoran.

Sa makadaghan nakigsulti kanato ang Ginoo apan kita wala magpatalinghug niini. Nahimong sirado ang atong mga kasingkasing ug salabutan.

Isip mga Kristohanon angayan natong ablihan uban ang paglaum nga ang Dios kanunay gyud nga naglihok sa atong kinabuhi.

Siya ang naggiya nato hangtud hangtud karong mga panahona. Ang iyang gahum maoy naglihok busa dili na kini angayan nga dudahan.

Lihok

Pagtuon kalabaot sa pagtuo. Uban ang maong pagtuon mao man ang personal nga pagdawat kang Kristo nga atong personal nga Ginoo sa atong kinabuhi.

Pangamuyo

Ginoo dugangi ang among pagtuo nganha kanimo. Dili unta kami magduda sa imong kaayo alang kanamo. ikaw nga buhi ug hari hangtud sa kahangturan. Amen.