Adunay kinumo nga nagpaluyo

Gisaway ni Senador Imee Marcos ang proposal nga kunhuran ang taripa sa bugas gikan sa 35% ngadto sa 15% na lamang kay “ill-conceived”  ug “ham-fisted” kini nga sulbad sa krisis sa bugas sa nasud. Ang suliran sa kamahal sa bugas dugay na’ng gisagubang sa katawhan apan wala gayod mahatagi of kasulbaran.   Kinahanglan ang gahi nga kinumo sa pagsulbad sa krisis sa bugas.  Kay ginaingon man nga “Ang nagpahipi nga mga kamot nga nagmani-obra sa panghitabo sa merkado dili makalihok kon wala’y nagpahipi nga kinumo nga nagpaluyo usab niini.” Muleeng!

Nurse ra diay ka doc?

Gisikop sa National Bureau of Investigation (NBI) ang usa ka 61-anyos nga lalaki nga nagpakaaron-ingnon nga mananambal bisan dili siya lisensyado nga physician.  Milanat na’g 20 ka tuig ang pagpanglimbong sa suspetsado.  Nasayran usab nga kaduha na siya mokuha’g pasullit sa pagka-doktor apan wala siya makapasar. Makapahinumdum sa inahan nga nangutana sa kahimtang sa iyang pasyente sa pag-ingon, “Dok, kumusta na man ang akong anak?” Mitubag ang gipangutan nga “Ok na ang iyang kahimtang Manang apan dili man ko doctor, Nurse ra man ko”.  Gikorehian dayon sa inahan ang iyang kaugalingon sa pag-ingon, “Aw, Nurse ra diay ka Dok?” Pagkatoytoy!

Maanad ra kita

Gikataho sa Philippine Coast Guard ang lain na usab nga pagpang-harass sa China pinaagi sa pagbabag sa Chinese Coast Guard sa gipahigayon nga medical evacuation sa sundalo nga naka-base sa BRP Sierra Madre didto sa Ayungin Shoal.  Halos matag adlaw, aduna kitay masinati nga pagpang-harass sa China.  Apan hangtud karon pulos pagarpar lang ang gihimo sa atong mga opisyales.  Ni’ng pagtugot sa padayon nga pagpang-harass sa China kanato, mora’g giingnan lang kita sa atong kagamhanan nga, “Pasagdi lang kay maanad ra lage ta sa kadugayan.” Madahaan!

Gipakasala ang uban

Giawhag sa DepEd ang pag-obserbar sa hustong decorum sa pagpahigayon sa mga graduation ceremonies aron mapatigbabaw ang solemnidad sa maong okasyon.  Ang awhag giluwatan tungod sa video nga mikatap diin nagpakita sa mga tinun-an nga nagsayaw-sayaw human makadawat sa ilang diploma.  Alang sa DepEd, dili kini tukma sa maong okasyon. Dili tingale ang mga estudyante lang ang angay badlongon kon dili lakip usab ang mga magtutudlo nga diha mismo sa maong graduation rites apan wala makabadlong sa panghitabo.  Mao na’y giingon nga “Usahay ang sala ni Juan, si Pedro ang maham-akan.”  Fezteleern!

Kulon batok kaldero

Gipanghimakak sa pangulo sa Management Information and Computer Services (MICS) sa Cebu City Hall nga si Dante Arcilla ang alegasyon nga nagdawat siya og sweldo sa dakbayan bisan wala siya magtambongan sa trabaho dugang ang pagpamahayag nga politika ang motibo sa maong pasangil.  Daghan na ang nagbantay sa mga lihok sa empleyado sa city hall.  Apan adunay taho nga kabahin ra usab sila sa mga empleyado sa kanhi administrasyon nga gituohan usab nga kurap ug labaw pa nga laksot ang binuhatan.  Kon ugaling tinuod ang maong obserbasyon, nahisama sila sa “Kulon nga misaway sa kaldero nga itom kuno ang bulok niini.” Saoonz!