Hinaut andam na sa ting-uwan

Gipahibawo sa PAGASA nga hingpit na'ng nahuman ang El Niño.

Matud hinuon sa ahensiya nga dili pa hingpit mawala ang kaalimoot sa ubang mga dapit dinhi sa nasud.

Apan sa dili madugay posibling mobanos ang La Niña o ang grabing pag-uwan.

Ang pangutana, andam na ba ang kagamhanan sa dakbayan sa Sugbo sa pag-abot sa tinguwan?

Hinaut gipahimuslan sa mga hingtungdang ahensiya ug opisyal sa kagamhanan ang mga panahon nga nahubsan ang mga agianan sa tubig aron pagpanglimpiyo niini.

Hinaut nga giandam sa kagamhanan ang gikinahanglang buhaton pagpalambo sa atong mga drainage aron pag-abot sa ting-ulan malikayan ang baha.

Hinaut dili magkara-kara ang atong mga opisyal pagpanglimpiyo ug pagpatuman og mga proyekto sa drainage sa higayon nga moabot na ang tinguwan.

Taud-taud na nga natukod ang Task Force Gubat sa Baha dinhi sa syudad busa hinaut nagbunga na ang ilang programa pagbawi sa mga easement sa kasapaan.

Bisan wala pa mahingpit ang pagpanglimpiyo sa daplin sa kasapaan gikan sa mga illegal nga istraktura apan duna nay nasugdan ang task force.

Kun epektibo ba ni sa pagpugong sa baha o dili, masukod ni sa higayon nga moabot na ang ting-ulan.

Dako hinuon ang akong pagtuo nga dili ingon niana ka dako ang impact niini pagsulbad sa problema sa baha dinhi sa syudad.

Hangtud dili hingpit mapatuman ang drainage masterplan nga maglakip sa pagpalapad sa gagmay nga mga agianan sa tubig magpabilin nga masinati sa syudad ang mga pagbaha.

Sigun sa mga eksperto gikinahanglan ang mas komprehensibo nga solusyon pagsulbad sa drainage problem aron masulbad ang baha.

Dili mosaler ang laktaw-laktaw nga paagi ug ang cleanup drive matagkaron ug unya.