Hope

Ang atong higala nga si Atty. Evelyn Trani Nuñez ang nidasig nato nga mohimo og hamubong video kalabot sa paglaum kun Hope.

Sa akong bahin luoy ug kaayo ang tawo nga walay paglaum. Sa laing bahin, ang paglaum kun hope makab-ot lamang kun ang tawong hingtungdan dunay dakong kaikag nga tumanon ang iyang misyon sa kinabuhi.

Misyon nga dunay kalambigitan usab sa iyang pulos ug tumong sa iyang kinabuhi. Apan unsay anaa sa paglaum? Ning paagiha atong hatagan og kahulogan og kahulogan ang matag letra sa pulong HOPE.

Happiness. Taliwala sa mga kalisdanan sa kinabuhi angayan natong batonan ang usa ka malipayong disposisyon. Kining maong malipayong disposisyon makagaan sa atong gipas-an nga mga suliran. Makahatag kini kanato sa kadasig sa pagpadayon diha sa usa ka mapuslanong kawsa.

Optimism kun ang pagka positibo. Dili nato sud-ongon ang mga butang ug panghitabo diha sa kalisud hinunoa himoong kahigayonan ang matag kalisdanan aron makab-ot ang bisan unsa nga atong gikinahanglan.

Prayer kun pag-ampo. Ang naandang pakig relasyon sa Dios ug ang paghunahuna nga dunay Dios sa atong kinabuhi kabahin man sa tinguha sa matag tawo nga mosinati og transcendence. Nunot niini ang pailob sanglit dili tanang gitinguha makuha diha diha.

Energy. Wala sa bokabularyo sa usa ka malaumong tawo nga kaluya. Kinahanglang sugnoran niya ang enerhiya sa pagkamakanunayon aron molahutay siya hangtud sa katapusan.