Adios, Msgr. Rudy

Dili mi suod ni Msgr. Rudy Villanueva. Pero nakaila kaayo ko niya, diin kaduha niya hiwaa akong kasingkasing, diin samtang nagluhod ko, puwerting tulo sa akong mga luha. Ngano? Ania, isugid ko.

Niadtong pag-attend nakog Samaria Seminar sa Lapulapu City, diin sa adlaw sa among graduwasiyon, kada partisipante giawhag paghimog apostolic-religious vows atubangan sa altar, samtang nagluhod ko, mibuhagay ang mahawot-matahom nga awit: ‘Gitudloan Mo Kami’.  Diin pag-abot sa chorus:

“Buksa, ang ganghaan ug mosulod lab-as nga hangin. Diyosnon nga kahayag modan-ag, matugob ka sa panalangin. Ang imong kasingkasing, hiusaha sa Iyaha. Ug ang tumang katam-is, tagamtama, tagatama!”

Pastilan, mikalit lang paghuot akong dughan nga na-bulls eye sa halawom nga mensaheng gipasabot sa maong religious song ug wala makapugong sa akong mga luha. Gisusi ko kon kinsay composer niining kantaha? Ug akong nasayran si Fr. Rudy diay.

Dihang na-Santos na si Beato Pedro Calungsod, misimba among pamilya sa misa nga gipahigayon sa bag-ong natukod nga San Pedro Calungsod Shrine sulod sa Cebu Archbishop Palace, D. Jakosalem, Cebu City.

Dihang giawit ang ‘Way Sukod ang Pagmahal’ nga kaamgid ang kalidad sa kantang ‘Bato-balani sa Gugma’ diin mabati ang buhi kaayong presensiya sa Ginoo, pastilan, nakahilak na sab ko. Ug misamot akong pagdayeg ni Msgr. Rudy human masayod nga siya diay gihapon ang composer niini.

Best musician si Msgr. Rudy. Siya ang nagtukod sa Philippine Amusement and Gaming Corporation (PAGCOR) choir sa Cebu Branch.  Dali kaayo makatultol iyang mga dalunggan kinsa ang yabag panahon sa mga praktis, diin siya eksperto na unsaon pagbahinbahin sa mga blending notes aron maanindot ang pagka-arrange niini.

Usab, maayo mo-homily si Mgsr. Rudy. Dili motira-mangasaba, kondili, very friendly and fatherly. Kang kansang kahait sa pagtulon-an modulot sa kasingkasing sa mga nanimbahay.

Nasuod siya sa mga Pagcorians, ilabi na ni Florencio ‘Polot’ Rendon, kinsa iyang gipakasamang usa ka bilihong anak ug kinsa, sa nahabiling mga adlaw sa iyang pagpakabuhi, gihimo niyang dangpanan-kaparaygan matag higayon nga nagkinahanglan siyag kauban paggakos sa katahom sa kinaiyahan.

Kanimo, Polot, ako misaludo. Ug kanimo, Msgr. Rudy, kinsa mipanaw nga nagbilin og dili mapapas nga mga bulawanong tunob dinhi sa kalibotan: “Adios, Nyor, adiyos! We know, God loves you.”