Pangilad sa kasal

Hunyo na diay, tingkasal na sad kay lagi gustong maapil sa June bride kay timing usab karong buwan nga nagsugod na ang ting-ulan bugnaw ang panahon nga lami gyud idulog dulog human sa kasal o pahimuslan ang katam-is sa honeymoon.

Busa excited ang tanan ilabi na ang bride and groom nga makapahiluna na sa salag sa kaminyoon.

Apan ang dream wedding nga gitinguha nahimo mang dakong urom tungod sa mga tawong mangingilad nga mamiktima sa ilang isig ka tawo.

 Dili na kini bag-o pa kay matag karon ug unya aduna kitay madawat nga reklamo nga nabiktima lagi sa mga tampalasan nga mga wedding coordinator o wedding planner nga murag tagolilong nga dili na magpakita human og dawat nila sa kwarta.

Kahinumduman nga aduna gani to kaniadto nga niyaka og nihilak ang bride kay pag-adto nila sa reception sa kasal wala diay didto ang kaon kay nailad sila sa coordinator nga milamoy lang sa kwarta nga ilang gibayad.

Nauwawan intawon sila sa mga bisita pero wala na silay nahimo nabiktima na ug charge to experience nalang nga dili gyud nila mahikalimtan.

Daghan kaayo makadani nga promotion ilabi na sa social media nga barato ra ug nindot ang resulta. Pastilan kong ingon niini ayaw nalang padayon kay seguradong ang dream wedding kutob nalang sa damgo nga ini’g mata igo nalang sa paghilak kay dautang damgo ra diay.

Aron segurado gyud nga dili mailad sa mga walay konsensiyang mga mangingilad pangunayan nalang og andam ang kasal o kadtong mga kasaligan gyud ang kuhaon, dili man gani makasalig karon sa mga gitoohan natong suod nga higala kay utro pud na sila nga mangilad.

Unsaon nga karong panahona busy naman ang tanan isalig nalang sa ubang tawo ang mahinungdanon nga panghitabo sa kinabuhi, ang resulta nganga kaon og hangin.

Bahala na og mahal itandi sa uban basta segurado lang kay sa barato nga igo ra pud naglabay sa kwarta ngadto sa mga wedding scammer.

Kong mahimo gani ayha na bayran tanan inig anaa sa venue nga naa na gyud ang gikasabotan nga pagkaon ug serbisyo aron walay mahayan sa kaulahian.

Labaw sa tanan mag background check gyud sa mga tawo nga wala gani na kaila kay dagko intawon nga kwarta ang envolve niini nga matintal ang uban nga idagan nalang.