EDITORYAL - Piratang Chinese namikil

Dili na makatarunganon ang gihimo sa China sa West Philippine Sea, niadtong Mayo 19, 2024 nag-air drop ang Armed Forces of the Philippines og mga supply para sa mga tropa sa Ayungin Shoal o Second Thomas Shoal.

Ang mga pinutos nga supply, dali daling gipanguha sa mga Chinese nga nagsakay og mga dagkong rigid hull inflatable boats (RHIBS) ug pugsanong gipangablihan dayun gisabwag sa dagat.

Ang mga pagkaon, tambal, tubig, prutas ug uban pang importanteng supply para unta sa mga tropa sa BRP Sierra Madre. Wala kapiog ang duha ka mga zodiacs sa mga Pilipino sa mga dagkong RHIBs sa China. Mura og mga pirata ang China.

Sakit kaayo pamation nga gisayunsayon lang pagtamay sa mga Chinese ang atong mga bayaning mga sundalo nga nagbantay didto sa atong teritoryo. Gitamakan ang garbo sa atong kasundalohan.

Apan angay silang dayegon ug saludohan tungod sa ilang propesyonalismo ug kataas sa pailob. Dili kinahanglang pamatud-an kun unsa sila kaisog.

Tungod kay intensiyon sa China nga hagiton ang mga sundalong Pilipino aron maoy unang mopabuto og armas aron duna silay rason para gamiton ilang military aron atakihon ang BRP Sierra Madre ug tanang isla sa Pilipinas diha sa WPS aron okupahon.

Sa pagbuhat sa China sa ilang salawayong gibuhat  nagkuha sila og video ug gipagawas didto sa China nga nagpakitang ang mga sundalong Pilipino nagkupot og armas, apan sa ilang caption “nanion og armas” sila ngadto sa ilang mga coastguard.  Ingon niana sila ka maldito, sila nay nanulong ug nanghasi ug nangilog sa mga supply sila pay nagbidyo ug gibali ang estorya.

Iampo lang nato nga ang atong kasundalohan nga nadestino sa WPS ilabi na sa BRP Sierra Madre nga patas-an pa ang ilang pailob ug dili magpadala sa kainit sa ulo.

Kun mag video ang China, mas maayong mag video sab sila aron dunay ipangatbang sa ilang propaganda videos. Nasayod ang China nga dili nila kayang kumbinshihon ang kalibotan sa ilang pangangkon, ug labaw ng dili sila makadirekta og atake gamit ang ilang militar sa mga Pilipino diha sa WPS tungod kay siguradong kuninitan sab sila sa kalibotan.

Kinahanglan nilang mohimo og senaryo nga diin mogawas ang Pilipinas maoy nanguna og gamit og kusog.